Ginnungagap

2007-07-09T00:55:00.000Z

Sögur úr sveitinni, barnasaga eftir mig.

Einu sinni vaknaði ung stúlka í vonda rúminu í herberginu sem hún deildi með systur sinni. Hún svaf í vonda rúminu en ekki því góða af einhverjum óútskýranlegum ástæðum sem ekki eru til rök fyrir. Hún flýtti sér fram úr, klæddi sig og vakti bróður sinni. Svo héldu þau bæði til fundar við Spes sem enn var einsömul, stúlkunni til mikilla vonbrigða. Því næst hélt hún af stað í vinnuna á silfurfáknum. Hún kom aðeins of seint eins og venjulega en það gerði ekkert til þvi hún hefur þróað með sér hæfileika til að taka til morgunmat á ljóshraða. Vinnudagurinn leið eins og venjulega og þegar klukkan var loksins orðin hálf fjögur fór hún að hugleiða að halda heim á leið á ný. Þegar hún kom heim fór hún beint í kaffi á holti eins og venjan segir til um. Kaffisamsætinu bárust þær fréttir að Spes væri loksins orðin léttar. Þá varð unga stúlkan rosalega kát. Þegar leið á kvöldið stækkaði fjölskyldan í þvottahúsinu jafnt og þétt en lokaniðurstöður urðu því miður þær að aðeins þrjú af afkvæmunum fimm komust lífs af. Unga stúlkan fór hamingjusöm að hátta þetta kvöld og það skyggði ekki á hamingjuna að útsýnið úr baðherbergisgluggan var sérlega glæsilegt það kvöld.

Síðan eru liðnar þrjár vikur og unga fólkið í þvottahúsinu er orðið miklumiklu stærra en myndirnar segja til um auk þess sem það er afskaplega lífsglatt!

(Vá hvað þetta er sljótt! Það verður þá bara að koma meira seinna...)

ArNAhjöRleIFSdóTtirgRænAvaTNi4

Poverty is the worst form of violence (Mahatma Gandhi)

2007-04-30T23:29:00.000Z

Ég er klárlega ekki efni í forritara ársins. Ég breytti til hjá mér til að gera nú allt fínt og fallegt en það er galli á gjöf Njarðar. Allt sem ég var búin að stilla að mínum þörfum datt út og ég þurfti að byrja frá grunni. Ég er búin að sitja sveitt í allt kvöld við að setja tenglana inn upp á nýtt, koma haloscaninu aftur inn, koma blogger-kommentakerfinu út og ég veit ekki hvað. Þetta þarf allt að gera á einhverju geimtungumáli. Mér tókst þetta í grófum dráttum en eftir situr tómt Previous Post, ég hef ekki græna glóru um það hvernig ég á að laga það en það verður bara að hafa það. Svo á ég sjálfsagt eftir að bæta einhverjum í tengla, þið sjáið bara um að minna mig á það.

Inn á milli blótsyrða og þess að reyna að muna 20 gleymd password horfði ég á American Idol. Ég var orðin eins og amerísk grenjuklisjukerling með útbitna samvisku því það var fjáröflunarþáttur til styrktar ýmsum góðum málefnum. Það er hræðilegt að sjá aðbúnaðinn sem sumt fólk býr við. Sumir berjast við það alla daga að sjá fyrir fjölskyldunni sinni en það oft bara ekki nóg, fólk er að svelta allstaðar í heiminum! Það er líka erfitt að reyna að sjá fyrir börnunum sínum þegar maður er sjálfur langt leiddur af alnæmi eða öðrum sjúkdómum. Hvað þá þegar öll börnin manns eru með malaríu! Fátækt er ekki eitthvað sem er allt í lagi að viðgangist bara af því að hún hefur alltaf verið til! Hvorki í Afríku, Ameríku eða Íslandi (já það er til fátækt fólk á Íslandi)! Og hvað geri ég? Ég geri mest lítið nema að fá allasvakalegt samviskubit yfir kexinu sem ég var að borða en mig langaði ekkert rosalega mikið í. Og guð veit að ekki var það hungur sem knúði áfram átið!
Það eru bara svo rosalega margar leiðir til að láta gott af sér leiða að ég á eftir að eiga í hinum mestu vandræðum með að ákveða hvað ég ætla að styrkja. En það er víst að samviskan hættir ekki að naga fyrr en ég læt gott af mér leiða! Hvað með þína samvisku?

Rigning í febrúar

2007-02-15T18:25:00.000Z

Einu sinni voru Arna og Ragnhildur 9 ára. Þá héldu þær upp á afmælið sitt í sameiningu heima hjá Örnu á Grænavatni. Þær voru rosalega smart og sætar við það tilefni.

Seinna urðu Arna og Ragnhildur 19 ára. Þá voru þær enn meira kúl en fyrir 10 árum. Það kúl að það tók ótrúlega langan tíma að finna mynd sem þær voru báðar á.

Það hrjáir mig ótrúlega fyndið vandamál. Í tvo daga er hægra augnlokið á mér búið að vera bólgið. Það lítur út eins og ég hafi grátið í viku en bara með öðru auganu. Í morgun þegar ég vaknaði leit ég út eins og hefði verið barin en marbletturinn gleymt að koma. Þetta er þó allt að koma til og ég býst við skjótum bata.

Eftir að ég hætti í tónlistarskólanum finnst mér ég vera í fríi á hverjum degi eftir skóla. Ég fer heim, fæ mér kaffi, fer í tölvuna, læri jafnvel heima og ef þannig liggur við sofna ég í sófanum. Nýja lífið er skemmtilegt þó ég sakni þess vissulega að vera í tónlistarskólanum. Hvað verður eiginlega um mig eftir páskafrí? Þá verður Gettu betur búið og ég verð bara í skólanum! Hvernig ætli ég höndli það? Það er samt bara seinni tíma vandamál. Í augnblikinu ætla ég að halda áfram að einbeita mér að því að vera átján ára meðan það varir.

Einu sinni var - frh

2007-02-03T21:15:00.000Z

...systkynakærleikur móðins á jólaballi.

...jólakortamyndataka. Hrólfur át filmubox, Brynja rembdist við að halda gosbrunninum inni á myndinni og Arna æfði Zoolander svipinn.

...Arna í allt of stórum jakka á öskudaginn.

...Var Hrólfur 4 ára og þá voru Halldóra og ljónin ástirnar í lífi hans.

...Þorgerður kát og Hrólfur Kasanova junior

...fór Brynja á klósettið og Arna bara varð að fara með til sinna mikilvægum erindum eins og til dæmis að binda á sér fótinn.

...afmælisveislur sko ekkert slor.

Einu sinni var...

2007-01-27T02:21:00.000Z

... Arna á leiðinni í leikskólann með bananabrauð og kókómjólk í grænni tösku

...Brynja bolla með rauðan sjóhatt og í rauðri kápu.

...Arna hrædd við stjörnuljós.

...Hrólfur góður við Trýnu

...Brynja að drekkja Örnu í baði.

...Brynja kúl, Stjáni blái sköllóttur og Arna skökk.

Allt að gerast

2007-01-19T21:02:00.000Z

Loksins er það að gerast sem ég hef verið að bíða eftir. Ég er ekki að tala um það að prófin séu að verða búin. Ég er ekki heldur að tala um Gettu betur - það er kapítuli út af fyrir sig. Ég er að tala um HM í handbolta. Hrólfur -farðu að taka fram hjálminn og fjötrana.

Það eru mjög athygslisverðir bakþankar aftan á fréttablaðinu í dag (föstudag). Þar er Sigurjón Kjartansson að tala um hvað hann væri mörgum handtökum frá einhverjum merkilegum. Hann rekur sig til dæmis fjórum handtökum frá Hitler, er tveimur handtökum frá Bush og öðrum stórmennum og þekkir mann sem er 6 handtökum frá Beethoven (hvernig sem það gengur upp). Svo í staðinn fyrir að læra eyddi ég deginum í að pæla í því hvort ég gæti rakið mig saman við einhvern merkismann. Fyrst datt mér enginn merkilegur í hug nema einhverjir íslenskir nóboddíar. Svo datt mér í hug að nokkrir af þessum veiðimönnum mínum væru nú soldið stórir karlar og hefðu sjálfsagt tekið í hendurnar á einhverjum sem hafa tekið í hendina á einhverjum sem er merkilegur. Það var ekki fyrr en núna áðan sem mér datt í hug að líta mér nær. Það vill svo til að mamma er nuddari, meira að segja nokkuð góður nuddari. Þar af leiðandi hefur hún nuddað þónokkra merkismenn, íslenska, útlenska, stóra, litla, merkilega, ofmetna, vanmetna og svo framvegis. Það sem rann samt síðast upp fyrir mér er að það eru ekki bara hendurnar á fólkinu sem nuddarar taka í. Bíddu... þýðir það þá ekki að ég hafi komið við rassa út um allan bæ? Hvað eru mörg handtök frá mér í rassinn á þér...?

Nebensätze und Konjunktiv II

2007-01-11T14:12:00.000Z

Það er greinilega komin próftíð. Elli og Sigga eru stungin af til Kanarí og það eina sem ég og strákarnir tölum um er Lappi. Eða Lappi Gabríel eins og hann kallast á þessum árstíma. Mér reiknast það til að það sé akkúrat ár í dag síðan Lappi Gabríel skrifaði hér sína eigin færslu um það hversu óréttlátt og erfitt það væri að vera hundur sem ekki má hlaupa á eftir hverju sem er. Hann ætlar ekki að gera neitt slíkt núna því að sjálfsögðu hleypur hann ekkert sem hann má ekki hlaupa lengur, geltir aldrei þegar hann má ekki gelta og kúkar ekki þegar ég er ekki með poka. Eða þannig.

Þýska á morgun.
Arna.

Janúar smanúar

2007-01-03T19:23:00.000Z

Jólin eru búin og alvaran tekin við. Ótrúlegt hvað tvær vikur geta verið fljótar að líða. Ég tók mikið af myndum. Þar sem maður hefur ekkert að segja eftir næstum eins og hálfs mánaðar bloggfrí þá ætla ég bara að deila með ykkur nokkrum vel völdum myndum:

Arna á Alþingi

2006-11-23T19:03:00.000Z

Ég vil:

Efla menntunarmöguleika á svæðinu.
Stórbæta samgöngur og stytta leiðina til Reykjavíkur.
Búa öldruðum áhyggjulaust ævikvöld.
Lækka skatta.
Efla heilbrigðiskerfið og eyða biðlistum.
Bæta þjónustu við fatlaða.
Koma á stöðugleika í efnahagskerfinu
Fjölga atvinnutækifærum.
Skynsamlega nýtingu náttúruauðlinda.
Gera almannatryggingar réttlátari.

Ég bið þig nú, kjósandi góður, um stuðning í prófkjöri Bestaflokksins í Norð-Austurkjördæmi laugardaginn 25.nóvember. Ég tel mig hafa þá þekkingu, reynslu, dug og þor sem til þarf að þjóna hagsmunum Norðlendinga af atorku. Samkvæmt óskrifuðum reglum prófkjara-auglýsinga tek ég að sjálfsögðu ekki fram hvernig ég hyggst efla þessi þessi loforð, fólk verður bara að kjósa mig til að komast að því. Auk þess eru þetta sömu loforð og allir aðrir hafa verið að gefa svo því verður ekki veitt mikil eftirtekt þó ég efni ekki mín. Mér finnst samt mest spennandi hvernig ég ætla að fara að því að stytta leiðina til Raykjavíkur...

Í framhaldi af þessum yfirlýsingum kemur svo þessi týpíska klausa. Myndir af mér manninum, börnunum og hundinum úti í Náttúrunni, uppvaxtar- og afrekasaga mín rakin, störf í þágu flokksins og svo loks stuðningsyfirlýsingar frá fólki af öllum stærðum og gerðum þar sem ég er nánast mærð í guðatölu. Ég er í tísku.

Fjörsund

2006-11-19T18:37:00.000Z

Mikið rosalega er klár maðurinn sem skrifar íþróttafréttirna á mbl.is. Hann hefur fundið upp nýja íþróttagrein sem heitir fjörsund. Í fjörsundi er aðal áherslan lögð á að skemmta sér (án þess þó að drukkna) og sá sem skemmtir sér best vinnur. Dæmt er eftir úthaldi í fjörinu, fjölbreytni í stíl og hversu vel maður nýtir laugina. Leyfilegur klæðnaður eru rósótt sundföt og afar klæðilegar sundhettur. Nú um helgina var meistarmót Íslands í sundi og var þessari nýju íþróttagrein að því virðist skipt út fyrir hið hefðbundna fjórsund.
Ég leyfa mér að halda að þessar stúlkur hafi verið sterkar í fjörsundinu um helgina:

Þurrar tær gera hamingjusaman eiganda!

2006-11-14T17:50:00.000Z

Aldrei á ævinni hef ég verið eins ánægð með að eiga gúmmístígvél og í dag og í gær! Veðrið er ekki búið að vera upp á marga fiska, í gær lá 15 cm slabblag yfir öllum götum og í dag er búið að snjóa, snjóa og snjóa! Ég fæ nostralgíukast við það að vefja buxunum þétt utan um fæturnar og ég tala nú ekki um þegar að sokkurinn verður eftir ofan í stígvélunum, það er alvöru. Það er eiginlega bara eitt sem er frábrugðið því sem var. Í gamla daga voru nefninlega flestir aðrir í stígvélum líka en þegar ég lít í kringum mig í forstofunni í skólanum eru engin önnur stígvél. Það eru reyndar nokkur gellustígvél en þau gera ekki sama gagn og gúmmístígvél. Þar eru einnig nokkrir vetrarskór, mikið af strigaskóm, nokkrir sumarskór og þónokkrir opnir gelluskór (sem ég get fullyrt að eru í eigu busagella sem eru ekki enn búnar að átta sig á því að það er ekki heillandi að vera heimskur! (efa líka að kalsár heilli marga...))
Ég er að hugsa um að gera óformlegri könnun um það hverjir komust í skólann í gær án þess að blotna í fæturnar? Þeir sem búa á vistinni mega líka svara því það var allt annað en þurrt á milli vistarinnar og skólans. Þeir sem komu á bíl mega líka svara því hafa líklega þurft að synda í gegnum bílastæðið til að komast inn í skóla. Þeir sem eru ekki í menntaskólanum eða búa yfirhöfuð ekki á Akureyri mega endilega líka segja mér einhverjar góðar fótasögur!

Arna sem er ekki blaut í fæturna!
(Afhverju í ósköpunum segir maður samt að maður sé blautur í fæturna?)

Þjóðlendur hvað?

2006-11-09T23:49:00.000Z

Nú er komið að mér, sextugu Örnu, að tjá mig. Umræðuefni hennar í dag verður þjóðlendur. Eftirfarandi málsgrein er tekin af heimasíðu óbyggðanefndar og er um þjóðlendur:

"Fram að gildistöku þjóðlendulaga voru til landsvæði á Íslandi sem enginn eigandi var að. Með lögunum er íslenska ríkið lýst eigandi þessara svæða auk þeirra landsréttinda og hlunninda þar sem aðrir eiga ekki, og þau nefnd þjóðlendur. Í athugasemdum í greinargerð með frumvarpi til þjóðlendulaga kemur fram að gert sé ráð fyrir að þjóðlendur séu landsvæði sem nefnd hafa verið nöfnum eins og hálendi, óbyggðir, afréttir og almenningar, allt að því tilskildu að utan eignarlanda sé. Tilgangur laganna er að leysa úr þeirri óvissu sem lengi hefur verið uppi um eignarhald á ýmsum hálendissvæðum landsins. "

Ok, þetta er kannski gott og gilt. En hvers vegna í ósköpunum er verið að taka land þar sem enginn vafi leikur á eignahaldi og engin sýnileg merki um að þar séu auðlindir sem hægt sé að græða á?!? Á þriðjudaginn var kynnt krafa fjármálaráðherra fyrir hönd íslenska ríkisins á landi norðan og austan Vatnajökuls og það er ekki lítil krafa skal ég ykkur segja! Það liggur við að meirihluti Skútustaðahrepps fari undir þjóðlendur. Mikill partur af Reykjahlíð og einnig partur af Grænavatnslandi. Og það eru ekki bara sandar og dauðir steinar sem verða teknir af okkur Grænvetningum heldur verða nokkrar af gersemum landareignarinnar eign allrar þjóðarinnar nái tillögurnar fram að ganga. Dæmi um þessar gersemar eru til dæms, Bláhvammur, Heilagsdalur, Seljahjallagil, Bláfjall og Suðurárbotnar. En það sem mér þykir nú samt verst af öllu er að Sellandafjall verður samkvæmt nýjum lögum þjóðlenda! Er ekki í lagi?! Ég er búin að prófa að vera hlutlaus og reyna að horfa á þetta hinu megin frá en ég get það bara ekki! Sellandafjall er einfaldlega yfir allt hafið!

Mynd eftir Ernu frænku mína, tekin í sumar þegar Sellandafjall var óumdeilanlega í landi Grænavatns.

Hægt er að skoða kort af nýjustu skandölum stjórnvalda hér.

Arna sem er sextug, bitur og þrjóskari en nokkurn tímann!

Þarf að þvo eitthvað af þér?

2006-10-29T23:00:00.000Z

Sum símtöl eru öðruvísi en önnur. Dæmi:

Hrólfur: Hæ
Ég: Hæ, hvað segirðu?
H: Bara fínt
Ég: Ok (orðin pínu örvæntinarfull yfir því að hann skuli hafa hringt, því á miðvikudagskvöldum þýðir það aðeins eitt...)
H: Hérna ég gleymdi að taka upp Bráðavaktina.
Ég: HA!! Hvernig gastu gleymt því %#$*~... Horfðiru þá á hana til að geta sagt mér hvað gerðist?
H:... eeee nei- eða jú bara endinn.
Ég: Og hvað er hún orðin ólétt? (Ég þakka internetinu fyrir að fylla í eyðurnar þegar upptökustjórinn er ekki að standa sig...)
H: Já hún sagði honum það í endann og...

Þarna hefðum við getað skilið sátt og ég lesið það á netinu hvað gerðist líka í þættinum en nei, samtalið var ekki alveg búið...

H: Hérna kemurðu um helgina?
Ég: Já ég veit ekki annað, nú?
H: Það er sko íþróttamót á föstudaginn og það vantar eiginlega foreldra til að sjá um matinn og ég sagði að þú gætir kannski gert það...
Ég: HA?!?!
H: Já, geturðu það?
Ég: ...(fann enga nógu gáfulega afsökun til að geta neitað) með hverjum verð ég?
H: Bara einhverjum mömmum.
Ég: jaaaá ok, ætli það ekki...(Sjittfokksjittsjitt!)

Svo ég fór út í skóla skjálfandi á beinunum (alltof seint reyndar en halló - ég þurfti að koma mér frá ak á hálftíma hefði ég átt að standast tímasetningar...) og þegar ég kom voru súpermömmurnar eiginlega bara búnar að öllu þannig að ég fékk að skera lauk. Tvo lauka meira að segja. Ekki svo hræðilegt. Svo fékk ég að fara út í íþróttahús og sjá krakka (sem mín dómgreind hélt að væru í fjórða bekk en eru víst í sjöunda...) keppa í íþróttum og hormónastarfsemi. Svo fékk ég að fara aftur í skólann að setja pitsur í ofn og skeiðar í kokteilsósu og djús í könnur. Svo fékk ég að vaska upp áður en ég fór heim með hálft tonn af pítstuafgöngum. Þessi innsýn í vanmetinn heim súpermömmunnar hafði áhrif á mig alla helgina. Ég fór til dæmis ekki úr flíspeysunni alla helgina og í dag gargaði ég bökunarleiðbeiningar meðan ég var í sturtu. Eins gott að síminn minn er búin að vera batterýislaus alla helgina - annars hefði Volvo-umboðið kannski náð í mig...

Svo loðnir, svo sætir, svo...fáir!

2006-10-20T19:32:00.001Z

Ég fór í þrjár búðir í dag til að leita mér að almennilegum bláberjum. Þau voru mygluð í Bónus, pínu mygluð og á uppsprengdu verði í Hagkaup svo ég endaði í Nettó þar sem þau voru bara dýr.

Ég er að gera fyrirlestur í ensku um tígra og það er svo gaman að vita allt í einu svona mikið um eitthvað sem ég vissi sama sem ekkert um fyrir viku. Núna er ég með öll litaafbrigði randafjölda, meðgöngutíma og útbreiðslu á hreinu. Mér finnst til dæmis svolítið svakalegt að um aldamótin 1900 voru til 100.000 villtir tígrar í heiminum en núna eru þeir bara 5000! Ég er að vinna verkefnið með Valgerði og Guðjóni og mér finnst svo gaman að sjá hvað við erum mismunandi. Ég held ekki vatni yfir ógnvæglegum tölum og myndum sem eru flottar á litinn á meðan Valgerður missir sig yfir myndum af tigercubs (sem eru ss tígrakettlingar)! Mússímúss.

Ég ætla heima á eftir og um leið og ég kem heim verð ég að gjöra svo vel að baka tvær kökur fyrir elskulegan bróður minn svo hann geti selt þær á kökubasar á morgun. Svo er bara slægjufundur, slægjuball og lærdómur um helgina.

Arna sem er orðin leið á því að baka alltaf kökur en fá aldrei að borða þær...

Svo loðnir, svo sætir, svo...fáir!

2006-10-20T19:32:00.000Z

The biggest looser?

2006-10-14T21:55:00.000Z

Ég held að ég hafi náð botninum núna rétt áðan... Ég fór í annað skipti í dag út úr húsi rétt áðan og það var til að kaupa mér nammi. Ég fór út í morgun til að skila af mér köku. Annars er ég bara búin að vera heima og gera ekki neitt nema lesa í Íslandsklukkunni. Mér líður eins og ég sé ein í heiminum því af einhverjum ástæðum eru þeir vinir sem ekki eru að vinna í amk 100 fjarlægð. Svo núna í kvöld er Kári að vinna, Elli og Sigga eru í matarboði og Siggi í heimsókn. Ég er s.s. ein heima með So you thing you can dance og namminum mínu. En nei þá fatta ég að mig langar ekki í nammi fyrr en ég er búin að borða! Og hvað gerir einmana aumingi sem langar ekki í jógúrt...? Jú hann pantar sér pítsu og sekkur dýpra!

Pítsa: tjekk
Nammi: tjekk
Sjónvarp: tjekk
kúlheit: ...ekki svo mikið tjekk.

Klifra

2006-10-10T19:52:00.000Z

Uppáhald mitt á sauðfé hefur varla farið fram hjá neinum fastagesti Ginnungagaps. Þess vegna ætti það ekki að koma neinum á óvart þó þessi færsla snúist um rollu, nánartiltekið Klifru. Það er ekki á neina kynbótaskepnu í mínum stofni hallað þó að ég segi að Klifra sé uppáhaldskindin mín. Klifra fæddist í Bakkhúsum í maí árið 1997. Hún er dóttir Mýrispýtu og Hrúts sem hringdi aldrei aftur og skiptir því ekki máli. Ásamt Klifru komu í heiminn ónefnd systir og gæðaskepnan Bossi. Klifra dvaldist ekki lengi í Bakkhúsum því mamma hennar gat ekki séð um öll lömbin og Klifra fór því í fóstur suður á Grund þar sem hún hefur dvalið síðan. Aðskilnaðurinn frá móðurinni var Klifru erfiður hún átti erfitt uppdráttar hjá nýrri móður sem sýndi ekki mikinn áhuga á henni til að byrja með. Á því tímabili var Klifru gefinn peli því hún fékk ekki mjólk hjá fósturmömmu sinni. Þá varð hún mjög hænd að mannfólkinu. Sambandið við fósturmömmuna (sem ég er ekki frá því að hafi heitið Slæða...) gékk ekki upp svo Klifra, vinur hennar Malli og eitt ógæfulamb í viðbót dvöldu á eyju í Mývatni það sumar. Þar undu þau sér við leik og át fram á haust. Þegar Klifra kom heim var hún sælleg með exem á eyrunum. Ég veit ekki hvort það var vegna smæðar hennar eða fegurðar sem faðir minn þyrmdi sál hennar, en hún fékk allavega að lifa. Þegar þá um haustið var Klifra farin að sýna sterk merki þess að vera skemmtileg skepna þannig að ég var ekki lengi að eigna mér hana. Það var góð ákvörðun því Klifra hefur reynst vera hin mesta kynbótaskepna auk þess sem hún lífgar upp hversdaginn. Klifra hefur eignast það mörg afkvæmi að ég hef ekki hugmynd um helminginn af þeim, en það eru án efa flottustu skepnurnar í húsunum. Kannski liggur áhugi minn á Klifru mikið til í því að við erum líkar, bæði í skapi og smekk. Hún er ákveðin og sólgin í brjóstkykur, kex, svala og eiginlega bara allt matarkyns...

Kaffi?

2006-10-04T22:48:00.000Z

Ég upplifði jómfrúarkoffínskjálftann minn í dag (af völdum kaffis þ.e.a.s.). Ég fékk mér sem sagt sviss mokka. Mér leið rosalega fullorðinslega þegar ég fór og bað um "kaffi til að fara með" og fann til mín þar sem ég stóð niðri í bæ og sprangaði um með bollann. Mér fannst kaffið ekkert vont en svo sem ekkert rosalega gott heldur og náði að komast vel niður fyrir hálfan bolla þegar ég gat ekki meira. Stuttu seinna fór mér að líða undarlega, svolítið svipuð tilfinning og þegar ég er í bíó og drekk mikið kók. (Sem sagt skjálfti, stífir vöðvar og erfðileikar við að koma út úr mér setningu án þess að bíta út mér tunguna). Og þar sem ég stóð á planinu við bónus rann það upp fyrir mér að ég hefði upplifað tilgang kaffis. Þetta væru áhrifin sem margir sæktust eftir þegar þeir fengju sér kaffibolla til að hressa sig við. Eftir þessa tilraun mína ákvað ég að ef mig virkilega langaði til að skjálfa og verða ofvirk fengi ég mér bara kók eins og í gamla daga - kaffi bíður þess að ég verði heilshugar fullorðin.

Í fyrradag þóttist ég ætla að fara út og taka myndir af haustlitunum í álfabyggðinni en þegar gáfnaljósið ég kom út var orðið hálfdimmt svo ég endaði bara á því að taka mjög listrænar myndir af laufblöðum og skuggum og himni. Ég veit reyndar ekki hvað fólk hefur haldið að ég væri að gera þar sem ég stóð undir trjám og glápti upp undir þau með uppréttar hendur. Það má bara halda það sem það vill.

Kaffi?

2006-10-04T19:56:00.000Z

Ég upplifði jómfrúarkoffínskjálftann minn áðan (af völdum kaffis þ.e.a.s.). Ég fékk mér sem sagt sviss mokka. Mér leið rosalega fullorðinslega þegar ég fór og bað um "kaffi til að fara með" og fann til mín þar sem ég stóð niðri í bæ og sprangaði um með bollann. Mér fannst kaffið ekkert vont en svo sem ekkert rosalega gott heldur og náði að komast vel niður fyrir hálfan bolla þegar ég gat ekki meira. Stuttu seinna fór mér að líða undarlega, svolítið svipuð tilfinning og þegar ég er í bíó og drekk mikið kók. (Sem sagt skjálfti, stífir vöðvar og erfðileikar við að koma út úr mér setningu án þess að bíta út mér tunguna). Og þar sem ég stóð á planinu við bónus rann það upp fyrir mér að ég hefði upplifað tilgang kaffis. Þetta væru áhrifin sem margir sæktust eftir þegar þeir fengju sér kaffibolla til að hressa sig við. Eftir þessa tilraun mína ákvað ég að ef mig virkilega langaði til að skjálfa og verða ofvirk fengi ég mér bara kók eins og í gamla daga - kaffi bíður þess að ég verði heilshugar fullorðin.

Í fyrradag þóttist ég ætla að fara út og taka myndir af haustlitunum í álfabyggðinni en þegar gáfnaljósið ég kom út var orðið hálfdimmt svo ég endaði bara á því að taka mjög listrænar myndir af laufblöðum og skuggum og himni. Ég veit reyndar ekki hvað fólk hefur haldið að ég væri að gera þar sem ég stóð undir trjám og glápti upp undir þau með uppréttar hendur. Það má bara halda það sem það vill.

Á ég að hafa þennan haus eða hinn...?

2006-09-28T00:07:00.000Z

Ég er haldin valkvíða á háu stigi. Ég er lengi búin að vita að ég á í erfiðleikum með að velja ef fleira en eitt er í boði, en það er bara nýlega sem ég uppgötvaði að þetta háir mér. Um daginn langaði mig til dæmis í ný sængurver svo ég skaust inn í Rúmfó. Andskotinn - hillurnar voru fullar af flottum sængurverum. Ég var nokkuð lengi að skoða, meta, bera saman og gera annað sem er bráðnauðsynlegt við svona framkvæmdir. En eins og mér einni er lagið gékk ég tómhent út úr búðinni þónokkuð mörgum mínútum síðar. Ég gat ekki valið hvaða flottu sængurver mig langaði í svo ég keypti ekki nein! Þetta er örugglega líka ástæðan fyrir því að ein ferð í súper tekur mig hálftíma. Ég geng um alla búð, skoða allt, ber saman, skoða eitthvað aðeins betur og enda með það sama og ég keypti síðast.

Ég elska þegar fólk safnast saman, fær sér göngu og endar á torginu í góðri ræðu. Þess vegna fór ég í mótmælagöngu í gærkvöldi. Mér líður illa yfir því sem er að gerast. Mér finnst hræðilegt að hugsa til þess að Hálslón sé að verða að veruleika - á morgun!!! Mér finnst hræðilegt að ég, lítið peð á plánetunni jörð, geti ekki gert neitt nema standa og horfa á.

Já ég ætla ekki að gleyma að segja frá því hvað ég er orðin háskalega villt manneskja. Ég ákvað til dæmis í dag að skella mér til Reykjavíkur á morgun. Í því felst að ég þarf að skrópa í amk einn tíma á föstudag og keyra heim á sunnudag. Ég má heldur ekki gleyma því að klukkan er að verða hálf eitt á virku kvöldi og ég er enn inni í stofu í tölvunni. Hvað gengur eiginlega að mér...?Og já, ég ákvað að létta mér lífið og fara í b stærðfræði þannig að ég var líklega að fórna mínu tækifæri til að verða kjarneðlisfræðingur - bömmer!

KF Nörd...

2006-09-21T19:33:00.000Z

Lífið heldur áfram. Það er eins og ég hafi aldrei farið í sumarfrí - lítið breyst nema númerið á bekknum mínum. Sama draslið er farið að safnast á sömu staðina og í fyrra og ég er strax farin að vera kærulaus, eins og í fyrra. Ég er búin að vera hérna í viku og draslið mitt er fyrst núna að komast á næstum því rétta staði...

Æskuminning/húsráð dagsins: Þegar ég var lítil og fór í mat á Holti þá var oft súpa á eftir matnum, nema ef það var laugardagur - þá var grjónagrautur. Og til þess að galgopinn ég brenndi ekki af mér munninn í græðgi minni, hellti Abba alltaf súpunni/grautnum á milli skála til þess að kæla það:) Góð saga Arna...

Afhverju var ég ekki fengin til að vera í Kf nörd...?

Sumarfrí

2006-07-16T23:23:00.000Z

Skrifstofa Ginnungagaps verður lokuð vegna sumarleyfa þangað til ástæða er til annars.

Virðingarfyllst, ég.

And down the waterfall....

2006-06-29T17:46:00.000Z

Klukkan hálf tólf í gærkvöldi byrjaði ég loksins að pakka og það tók ekki nema 5 mínútur. Taskan mín er hálf tóm og ég er með "ég er að gleyma einhverju"tilfinningu. Hún hlýtur að breytast í tilhlökkun um leið og ég stíg upp í vélina á eftir. Það munar öllu að geta flogið beint frá Akureyri. Köben í nótt, Gautaborg og Ropbbie á Sunnudaginn, Köben aftur á mánudaginn og svo bara blákaldur reunveruleikinn... Ferðin hefur nokkur takmörk: Finna utan á mig spjarir þar sem fataskápurinn minn fer bráðum að líða skort ef ekki verður gripið í taumana, skemmta mér vel, láta ekki ræna mig (eins og kom einmitt fyrir Brynju og allar vinkonur hennar nema eina fyrir nokkrum árum) og safna upp kjarki til að fara í Himmelskibet... Sjáum bara til hvernig það gengur.

Eins gott að Robbie elskan taki gömul lög líka því nýji diskurinn hans er ekkert svakalega spennandi. Ekki það ferðalagið, Gautaborg og Robbie sjálfur séu ekki nógu spennandi - hitt væri bara stór plús!

Nu skal jeg sove lidt inden jeg tager til flughavnen og vi ses senere, hej hej.

Veiðiheimilið Hof, Arna

2006-06-16T13:08:00.000Z

Bráðum verður Grænavatni 4 stungið í samband við umheiminn. Pabbi og Hrólfur þykjast verða að sjá HM svo að þeir pöntuðu sér bara gervihnattadisk. Hann kom síðan loksins í gær en þá vantaði eitthvert stykki svo þeir verða að bíða í nokkra daga í viðbót, Hrólfi til ómældrar óánægju! Ég verð nú reyndar að viðurkenna að andstaða mín við diskfjandann er farin að minnka eftir að ég skoðaði þá dagskrá sem mér verður í boði, það liggur við að ég geti bara sleppt því algjörlega að fara út í allt sumar. Ég átti loksins frí í gær! Það var yndislegt að gera ekki neitt. Vakna bara á mínum tíma, taka því rólega og gera svona hluti sem maður gerir þegar maður er heima. Ég á reyndar líka frí í vinnunni í dag en ég mætti eldsnemma í morgun á GB æfingu og þarf síðan að eyða deginum hér á Akureyri í að gera ekki neitt þangað til í kvöld því þá ætla ég út með stelpunum að halda upp á afmælið hennar Dagnýjar.
Ég þarf hvergi að eiga heima næsta vetur því ég verð alltaf annað hvort í skólanum, tónlistarskólanum eða í nýjast athvarfinu mínu, H1. Félagslíf og frítími - hvað er það?!?

Hoppandi hálfviti

2006-05-31T19:24:00.000Z

Ég held að ég sé ekki alveg eins og annað fólk! Síðasta mánuðinn hefur eitt af stóru verkefnunum mínum verið söngprófið. Svo þegar það var búið var ég strax farin að hlakka til skólaslita tónlistarskólans til að fá prófskírteinið mitt. Síðasta föstudag byrjuðu prófin í Menntaskólanum og ég hef ekki hugsað um neitt annað en líffræði, stærðfræði og núna síðast efnafræði. Í allan dag er ég svo búin að vera hjá Guðjóni að reikna. Þegar Guðjón keyrði mig heim rétt fyrir 7 var fullt af bílum við Glerárkirkju. Ég skildi ekkert í öllum þessum bílum og nefndi það við Guðjón en okkur datt ekkert í hug og ég hætti að hugsa um þetta. Svo kom ég heim og borðaði í rólegheitunum, fór svo í tölvuna og rakst inná bloggsíðu nemanda í tónlistarskólanum sem var að tala um að hann hlakkaði til að fá einkunnirnar sínar. Þá fyrst mundi ég eftir því að ég hafði átt að fara á skólaslit í dag klukkan 6 og fá skírteinið mitt. Ég hafði meira að segja átt að fara upp á svið og alles! Ég kveikti ekki einu sinni þegar ég sá alla bílana við kirkjuna! Eins gott að mér gangi vel í prófinu á morgun því hausinn á mér rúmar greinilega ekki aðrar upplýsingar þessa dagana, en þær sem varða efnafræði!

Glær og grunlaus á Grænavatni

2006-05-21T21:25:00.000Z

Hún gékk hægum skrefum upp stigann og inn í herbergið. "Úff" hugsaði hún með sér, "en það drasl". Hún var of þreytt til að nenna að taka til svo hún byrjaði að gera sig klára í svefninn. Hún tók af rúminu og byrjaði svo að afklæðast. Þegar hún dró bolinn yfir axlirnar fann hún að eitthvað var ekki eins og það átti að vera. Það var kalt. Hún reyndi að leiða kuldann hjá sér, klæddi sig í náttföt og stakk sér undir tvöfalda sængina með bók í hönd. Sagan sem hún las var spennandi og dró athygli hennar frá blánandi nefi og frosnum fingrum. Þegar augnlokin fóru að vara við verkfalli gékk hún frá bókinni og slökkti ljósið. Hún gætti þess að hreyfa sig ekki of mikið til þess að fara ekki út af upphituðu hlutum sængurinnar. Að lokum sofnaði hún við nauðið í glugganum, dúðuð í sængina.
Klukkan sex morguninn eftir byrjuðu óvænt læti á náttborðinu sem hún átti í erfiðleikum með að átta sig á. Grýlukertið sem lafði fram að nefi hennar hjálpaði til við að koma henni til vöku og hún áttaði sig á hljóðunum. Þegar hún bagsaði við að slökkva á ofurtæknilegu-vekjaraklukkunni varð henni litið í neðsta horn skjásins. Þar var hitamælir sem sýndi að lofthiti herbergisins var 12°. "Nú, þó það" hugsaði hún og reis á fætur. Það voru stærstu mistök hennar þann daginn. Úti fyrir glugganum var snjór yfir öllu og enn voru snjókorn að fjúka úr loftinu. Hún gaf sér dágóðan tíma í sjálfsvorkunn áður en hún hélt fáklædd niður tvær hæðir til að klæða sig enn betur og halda á vígvöllin. Förinni var heitið til bjargar varnarlausum sálum sem vissu ekki betur en að koman í heiminn væri hlý og notaleg. Þennan morguninn bjargaði hún þónokkrum sálum, sumum við komuna í heiminn, öðrum við fæðuöflun þar sem þeirra eigin mæður höfðu afneitað þeim.
Eftir nokkra stund snéri hún aftur heim og fór aftur í rúmið viti menn - hitinn var kominn upp í 12.5°. Svona leið dagurinn og um kvöldið var farið að snjóa aftur og það snjóaði og snjóaði. Nágranninn úr næsta herbergi hafði forritað ofninn fyrr um daginn þannig að hún sofnaði sæl og þreytt í 15°. Morguninn eftir var keimlíkur þeim fyrri nema að hitinn hafði enn hækkað og var nú farinn að nálgast 18°. Stúlkan fór að venju að athuga hvort einhverjar sálir þyrftu á björgun að halda og enn voru einhverjir sem ekki höfðu heyrt ráðleggingar hennar um að fæðast ekki í svona veðri. Snjórinn buldi á þakinu og henni var farið að kólna. Seinna þennan sama dag vöknuðu nágrannar hennar úr næstu herbergjum og í sameiningu framkvæmdu þau öll helstu haustverkin; Lokuðu fyrir öll göt og rifur, stóðu í ströngu við að loka hlöðudyrunum, sem höfðu verið opnar í langan tíma, og hýstu einn villuráfandi sauð sem þau höfðu í barnaskap sínum leyft að yfirgefa húsið. Allt var þetta eins og það átti að vera en samt var einhver rödd innra með henni sem sagði henni að ekki væri allt með feldu. Loksins rann það upp fyrir henni, hún hafði lifað í blekkingu náttúruaflanna. Það var sársaukafull elding sem laust niður í huga hennar þegar hún áttaði sig á því að það var ekki haust - það var vor!

Was?

2006-05-19T09:57:00.000Z

Í morgun vaknaði ég ógurlega hress og kát. Ég gékk hægum skrefum fram á bað teygði mig í tannburstann og leit svo í spegilinn. Venjulega heilsar mér í speglinum nokkuð illa til höfð útgáfa af mér (oft finnst mér ég reyndar bara líta ágætlega út á morgnanna, þroti og bólgur slétta húðina og varirnar eru eins og ég hafi farið í botox), morguninn í morgun var engin undantekning. Ég setti tannburstan upp í mig og ætlaði svo að virða mig fyrir mér en ég komst ekki lengra en að sjá upp að höku, og það enga smá höku. Hvernig stendur á því að maður fer að sofa með sæmilega höku en vakna með standandi undirhöku?! Ég hélt að mér hlyti að hafa missýnst og leit aftur en nei, hún er bara sest þarna að. Hvernig fer maður að því að æfa af sér undirhöku?

Ég var að hugsa um að skrifa hvað ég væri eyðilöggð manneskja yfir því að framsókn nái ekki inn manni í Reykjavík en ég hætti við það því ég gat ekki hugsað mér það að einhvern myndi ekki fatta kaldhæðnina...

I carried a watermelon!

2006-05-17T08:33:00.000Z

Í gærkvöldi hlustaði ég á escradio.com, þar sem heyra má eurovisionlög af öllum stærðum, gerðum og aldri. Á undan sumum lögunum sem eru að keppa núna kynna flytjendurnir sig og lagið sitt á misbjagaðri ensku. "Hæ mæ neim is Achenbract and tis is mæ song for At-hens tútásandsix." Svo eru ótrúlega hallærisleg remix af nokkurra ára gömlum lögum og það er eins og allir hafi sett lagið sitt á einn og sama grunninn því í remix útgáfunni hljóma þau öll alveg eins. Af og til eru lög líka kynnt "this is a eurovision classic". Það eru þá venjulega, eins og nafnið bendir til, klassísk gömul lög sem gerðu það gott. Ég held að það hafi einhver mistigið sig aðeins í gærkvöldi þegar Það sem enginn sér, framlag Íslendinga árið 1989 var kynnt sem eurovision classic. Ég veit ekki betur en að það hafi ekki fengið nein stig og hafi ekki verið neitt sérstaklega vinsælt, ekki einu sinni á Íslandi.
Danska tvistið fer ekki úr hausnum á mér. Mér fannst það ekkert spes í fyrsta sinn sem ég heyrði það en það verður flottara í hvert skipti. Ég er strax farin að hlakka til laugardagsins - ekkert er betra en blanda af eurovision og sauðburði! Robbie eftir aðeins rúmlega 40 daga!

He didn't know how to twist

2006-05-15T11:34:00.000Z

Vorið er komið! Sannanir fyrir því má finna í höfðinu á mér sem geymir nú allskonar óþarfa upplýsingar opnanir listasýninga sem ég heyrði á rás 2 um helgina, höndunum á mér sem eru eins og sandpappír og laginu sem ég er með á heilanum, en það er á tungumáli sem ég skil ekki.
Vikan verður erfið/skemmtileg/ógnvekjandi. Til að standast þær raunir sem bíða mín pantaði ég mér tíma í litun og plokkun, því hvað sem gerist þá verð ég allavega með fínar augabrúnir. Annað kvöld verður Gettu betur-kvöldvaka í skólanum og þar ætlum við Sigurlaug og Fjölnir að halda uppi heiðri 2.V í bekksagnamótinu. Á miðvikudaginn verð ég að læra fyrir stærðfræðipróf til að bæta fyrir árangurinn í síðasta stærðfræðiprófi! Á fimmtudaginn er svo Eurovision - það krefst ekki skýringa. Já og svo á föstudaginn er svo blessaða söngprófið mitt þannig að ég verð líklega að gefa mér tíma af og til til að fara í söngtíma og æfa mig.

Ég er haldin þeirri áráttu að vilja koma mér upp algjörlega gagnslausum hæfileikum. Einu sinni vildi ég geta orðið rangeygð á öðru og ég æfði mig og nú get ég orðið rangeygð á öðru. Einu sinni langaði mig alveg rosalega að geta blístrað með því að setja fingurna upp í mig og eftir langar æfingar get ég núna blístrað með fingrunum. Um daginn tók ég upp á því að ég vildi endilega klappa með annari hendi eins og Sigurlaug getur þannig að núna sveifla ég höndunum í tíma og ótíma til að reyna að láta koma klappihljóð. Sigurlaug er líka að reyna að kenna mér að blása í lófana á mér þannig að það komi einhverskonar blísturhljóð. Ætti ég að stofna eins manns sirkus?

Ég er Arna, ég er sextug

2006-05-08T22:07:00.000Z

Ég vildi óska þess að það eina sem ég þyrfti að hugsa um næsta mánuðinn væru rollur. Enginn skóli, enginn tónlistarskóli, engin próf. Bara ég, kindurnar, lömbin, fuglarnir, rás 2, gróðurinn, lopasokkarnir, góða veðrið og kyrrðin. Enda hef ég tekið þá ákvörðun að eftir menntaskólann ætla ég að taka mér ársfrí til að gera eitthvað skemmtilegt en hvað sem ég geri þá ætla ég að fara heim í maí og upplifa alvöru sauðburð - og ekkert annað! Ég heiti ekki Ísbjörg og ég er ekki ljón. Ég heiti Arna og ég er úr sveitinni!

Fram þjáðir menn

2006-05-02T01:05:00.000Z

Mér myndi ekki þykja það leiðinlegt ef það væru alltaf þrír dagar í helgi, maður gæti alltaf gert svo margt. Þrír dagar er svo miklu meira en tveir dagar! Ef maður á þrjá daga til aflögu sting ég upp á að maður:

Fari heim til sín, til að byrja með.
Fari pínu í fjárhús (eða bara mikið...)
Þrífi bílinn alveg inn að kviku
Fari í Kelduhverfi til Magneu gestrisnu og njóti samvista við hana og fjóra aðra óslípaða demanta
Nauðgi SingStar
Fari í Ásbyrgi og blotni í fæturna
Komi þrjá daga í röð til Húsavíkur.
Fari í þrjú kaffi á einum klukkutíma.
Fari ekki aftur til Akureyrar fyrr en mjög seint
Horfi mikið á Bráðavaktina

Ég er að reyna að læra á myndavélina mína og finna út allt sem hún býður upp á. Þessi leit dregur út listrænu hliðina á mér og ég ætla að deila með ykkur tveimur afar ólíkum myndum sem ég er afar stolt af.

Verðlaun fyrir þann sem veit hvað er á efri myndinni.

Stundin er runnin upp

2006-04-23T23:18:00.000Z

Ég elska tímabilið sem nú er að hefjast. Það er ekki bara vegna hækkandi sólar sem ég gleðst heldur eru önnur atriði mér kærari. Það er sauðburður og eurovision. Tímabilið byrjaði núna um helgina. Áhugi minn á þessari einu rollu þeirra kerlinga sem er komin að burði er nánast óhugnalegur. Ég spyr nánar um heilsu hennar og hegðun en veikra ættingja minna og ég skrapp af og til út í Bakkhús til að gá hvort það væri eitthvað sem ég gæti gert til að flýta fyrir ferlinu. Það er ekkert sem ég get gert. Eurovision tímabilið hófst opinberlega í gær með fyrsta þætti Norrænu pallborðsumræðanna. Ég er ekki alveg sátt með þær breytingar sem gerðar hafa verið á spekingunum. Mér finnst reyndar sæti daninn fínn enda var ég aldrei alveg viss með þann gamla. Mér finnst nýji kynnirinn hræðilegur. Hvað varð um hressu stelpuna eða sæta strákinn? Þessi gamli karl með slykjubrosið og hræðilegu klippinguna er ekki alveg að gera sig. Síðasta og sísta nefni ég sænsku kerlinguna. Hvað var málið, hún var í fyrsta lagi í gegnsæjum topp, leit út eins og tuska sem hefur gleymst úti á snúru í nokkur ár, með fjórum númerum of stórt hár og svo var hún eins og hún væri á einhverju ólöglegu! Mér fannst Charlotte Nilson (eða hvað sem hún heitir nú...) ekki heldur skemmtileg í fyrra. Mér fannst hins vegar konan sem var undan henni alveg afbragð. En þátturinn var samt ágætur þrátt fyrir þessa annmarka og mér finnst þeir Thomas Lundin og Jostein Pedersen algerir gullmolar.

Arna sem langar í klippingu.

Miðvikudagur til ...?

2006-04-19T14:19:00.000Z

Í dag er síðasti vetrardagur. Það þýðir að á morgun er Sumardagurinn fyrsti og ég elska sumardaginn fyrsta. Þegar við Anna vorum litlar tókum við allt í einu upp á því að halda brennu á sumardaginn fyrsta. Við sönkuðum að okkur alls konar rusli og dagblöðum og svo eyddum við löngum tíma í að brenna það. Sumir gætu haldið að þetta hafi verið táknræn athöfn, brenna burt veturinn en ég held að við höfum bara verið að svala löngun skemmdarvargsins í okkur. Mig langar í brennu...
Þegar ég kom að sunnan í gær hafði rúmið mitt hækkað um tuttugu sentímetra. Ég þarf varla að reisa mig við til að hafa umsjón með stærð gluggarifu. Ég er samt ekki að kvarta undan stóru dýnunni, ég þarf bara að venjast því að sofa í hásæti.
Ég þoli ekki að þegar maður hefur ekki mikið að gera gerir maður ekki neitt. Ég er búin að hafa tvo og hálfan tíma til að gera allt sem ég þyrfti að gera en í staðinn lá ég uppi í sófa og horfði á sjónvarpið (þakka guði fyrir stöð2 bíó...) og er síðan búin að liggja í tölvunni. Ef ég hefði haft eitthvað meira að gera hefði ég skipulagt mig og endað á að gera allavega brot af því sem ég þyrfti helst að koma í verk.

Nenni að velta mér endalaust upp úr leti minni. Mig langar að deila með ykkur mynd af okkur frændsystkinunum sem var tekin í tilefni afmælis mest hipp og kúl ömmu í heimi. Glæsileg á að líta ekki satt...?

Fullkomið heilbrigði

2006-04-16T18:41:00.000Z

Ég sit í reykjarkófi og sé varla á skjáinn. Þetta er í annað sinn í dag sem kalkúnninn hrynur í ofninum og veldur öndunar- og sjónerfiðleikum hjá öllum fjölskyldumeðlimum. Ég held að kalkúnsgreyið sé að reyna að segja okkur eitthvað og við erum svo squere að við skiljum það ekki. Bless bless góður páskamatur...

Ég er búin að vera að horfa á það var lagið í dag. Búin að einhverfast með heddfónana á hausnum og syngja með, sama hvort ég kann lagið eða ekki. En mér er sama - ég er skotin í Pálma Sigurhjartar.

O.C. búið í bili. Önnur sería er með því dramatískara í þessum heimi held ég bara. Boðið upp á alla þessa týpísku dramatík: óskilgetin börn, nokkur tilfelli um yfirvofandi framhjáhald, börn gerast samkynhneigð í mótþróa við foreldrana, gamlar klámmyndir, vandræðaunglingar sleppa úr fangelsi og gera allt vitlaust, óvænt drykkjuvandamál og hjartaáfall í sundlaug og morð í varnarskyni. Svo er reyndar líka einhver gamaldags ástarsaga um eina stelpu og tvo stráka en hver tekur eftir svoleiðis hallærisdrama...?

Er hætt að sjá á skjáinn sökum reyks - eins gott að kalkúnninn standi fyrir sínu.

Get ég aðstoðað?

2006-04-13T16:53:00.000Z

Það er fátt sem fer meira í taugarnar á mér en áhugalaust starfsfólk. Ég er ekki að tala um dónalegt fólk því ég held að ég hafi sem betur fer aldrei lent í því. Ég er að tala um fólk sem brosir ekki, býður ekki uppá hjálp sína, mumlar góðan daginn, horfir ekki á mann á meðan afgreiðslu stendur og hleypur frá borðinu um leið og það er búið að afgreiða mann. Alltaf eins og maður sé að trufla það þegar maður dirfist að koma og kaupa eitthvað. Ég var sem sagt í Kringlunni áðan og ég lenti í nokkrum svona. Maður er miklu ánægðari með vöruna þegar maður fær bros og þakkir þegar maður gengur út heldur en þegar maður fær ekkert.

Nóg um það. Ég fann lykt áðan sem ég hef ekki fundið lengi og við það fór allt af stað í hausnum á mér. Mig óraði ekki að það gætu verið svona margar minningar tengdar einni lykt. Ég var stödd inni í Body shop en við að finna lyktina var ég komin á boðsball á Stóru-Tjörnum síðan í klefann í íþróttahúsinu og loksins á íþróttamót á Laugum. Þessari lykt fylgja alls konar gelgju-minningar um atburði sem ég var búin að gleyma að hefðu gerst. Lyktin minnir mig líka á eldrautt bómullarpils sem ég átti þegar þvertoppurinn var alls ráðandi í mínu lífi. ,,The spirit of Moonflower" -flaskan sem mamma gaf mér þegar ég var svona tólf ára endist ágætlega lengi. Ég endurnýjaði hana aldrei en þarna þar sem ég stóð og var að borga í Body Shop leit ég við og sá fölbleikt yfirbragðið og fann að ég varð að finna lyktina einu sinni enn. Ég réði síðan ekki við mig og keypti body mist flösku af þessu bara til að geta spreyjað í kringum mig þegar mig langar að hverfa á vit gelgjunnar.
Ég held að gelgjan hafi verið ráðandi inni í Body shop því þar keypti ég líka bláan maskara. Gerir maður það...?

Draumalandið mitt...?

2006-04-06T23:35:00.000Z

Planið fyrir þessa viku var: Skila heimadæmum, skila og klára söguritgerð, fara í söngpróf, fara í Njálupróf og leyfa mér síðan að fara í páskafrí.
Vikan varð svo miklu meira: Skilaði heimadæmum og söguritgerð, sleppti söngprófinu sökum veikinda, tók ágætt Njálupróf, fór á Jesus Christ Superstar, fór á stórskemmtilegan fyrirlestur í Samkomuhúsinu þar sem Andri Snær kynnti bók sína, Draumalandið, fór ekkert í tónó, fór í bað um miðjan dag, nældi mér í aðra seríu af OC.

Frétt vikunnar númer 1 er samt það að hún Amma Dedda varð níræð í gær. Af því tilefni kom hún til Akureyrar og skellti sér á fyrirlesturinn hans Andra Snæs. Alveg rosalega hipp og kúl, hún amma.

Frétt númer 2 er svo að Menntaskólinn á Akureyri vann Gettu betur. Þeir unnu svo stórt að það var eiginlega ekki gaman en vá hvað það var gaman að vinna. Mér fannst líka svo gaman að sjá hvað voru margir í Kvosinni að horfa og svo fannst sextugu Örnu líka alveg rosalega flott að heyra að stuðningsliðið söng skólasönginn eftir að sigurinn var í höfn.

Páskafrí á morgun!

Frekjan alveg að fara með mig!

2006-03-25T23:24:00.000Z

Stundum get ég verið svo eigingjörn og íhaldsöm og fer að eigna mér hluti sem ég á ekkert í, eða hvað...? Þetta gerist aðallega þegar eitt ákveðið lag eða aðallega textinn á í hlut. Mér finnst það bara ekki passa að "einhverjir" syngi það án þess að meina það sem þeir syngja eða geti séð það fyrir sér. Þess vegna fer ég strax að gagnrýna þegar ég heyri þetta sungið af einhverjum sem vita ekkert um hvað þeir eru að syngja, þó þeir syngi það kannski ágætlega. Það hljómar aldrei eins vel og þegar það er gert af öllum viðstöddum í Skjólbrekku, kirkjunni eða í eldhúsinu í Baldursheimi. Það á bara við eina sveit - ekki hvaða sveit sem er! Það er ekkert hægt að lána það eitthvað á milli sveita, það á bara við sveitina mína!

Það er gott að vera búin að koma þessum eigingirnishugsunum frá sér. Ég er líka búin að koma frá mér íslenskuritgerð og er farin að hnýsast í líf Bríetar Bjarnhéðinsdóttur. Ég á líka eftir nokkur próf áður en langþráð páskafríið byrjar en mér er sama hvernig ég stend mig svo framarlega sem ég næ því eins og ástkær utanríkisráðherra sagði svo réttlega: "Maður getur ekki alltaf farið með sætustu stelpuna heim af ballinu en kannski eitthvað annað sem gerir sama gagn."

Afturbatapíkan!

Allt er nú leyfilegt

2006-03-22T23:07:00.000Z

Núna tvo morgna í röð er ég búin að slysast til að horfa á gerviþáttinn Strong Medicine og hann er bara búin að vera allt í lagi. En í morgun varð óhapp sem ég hélt að gerðist ekki í þessum geira. Ég held að þeir sem horfi á einn læknaþátt horfi á þá alla. Þess vegna finnst mér mjög lélegt þegar leikkona sem leikur eina reyndustu hjúkkuna á ER leggur sig niður við að leika einhvern heimskan sjúkling sem veit ekki hvað lungnablöðrumein er í öðrum þætti. Chuny Marquez er búin að vinna á Er síðan alltaf veit hvað lungnablöðrumein er!
Og ef einhver var að velta því fyrir sér þá hafa 7 hjúkkur starfað á ER síðan í season one. Það hlýtur nú að teljast ágætur árangur í svona þætti.

Hver getur upp á því hvaða sjö hjúkkur þetta eru? (6 af 7 alveg nóg) Ég veit að ég er ekki eini ER-nöllinn þarna úti, látið ljós ykkar skína!

Tunglið, tunglið taktu mig

2006-03-19T23:29:00.000Z

Suma daga er maður lítill og getur ekki neitt. Aðra daga er maður stór og getur allt. Í dag var ég stór og taldi fram. Og ekki bara fyrir mig heldur Brynju líka. Ekki það að þetta hafa verið neitt mál eða tekið meiri tíma en sjö mínútur en þetta er samt fullorðins.

Ég er líka fullorðins í heimsmálunum. Suma daga verð ég svo æst yfir stjórnmálum að ég er ekki mönnum sinnandi. Ég veit auðvitað svo miklu betur en þeir sem hafa eitthvað um málin að segja. Enda er ég ekki frá því nema þar sé ekki allt í standi þessa dagana...

Síðustu daga er ég búin að vera að stúdera hjátrú íslendinga og það er alveg hreint ótrúlegt hvað okkur hefur dottið í hug að gera. Hverjum dettur til dæmis í hug að setja eigið hland í augað á sér ef maður er með sýkingu. Eða drekka hrútshland og bera inná sér geitarleg sem getnaðarvarnir. Ég þakka guði fyrir að vera uppi á tímum augndropa og smokka.

Arna - sextug inni við beinið

Bóndi er bústólpi

2006-03-14T23:52:00.001Z

Hvunndagshetjan úr Mannheimum leitaði Betrunar á Nafnlausum vegum Landsins blá. Hinn týndi fannst loks á Blóðakrinum eftir að hafa lent í Hrakningum og Heiðarvegum og ekki batnaði það þegar Sléttuúlfurinn koma að Hraunfólkinu Strönduðu við Höll minninganna og Gilitrutt fékk sér heilsubótargöngu á Múrnum í Kína.

Merkilegt hvað margar og ólíkar bækur rata oft saman í eina litla hillu. Titlana hér að framan má alla finna í hillunni sem hangir gegnt rúminu mínu. Þar virðist samt ríkja regluleg óregla, til dæmis það að Ástarsaga úr fjöllunum stendur við hliðina á Jeppum á fjöllum. Auk þess má finna ótal kvæðasöfn, nokkrar orðabækur og u.þ.b. þrjú árþúsund af mannkynssögu. Hugsa sér að alla þessa vitneskju sé hægt að nálgast á tæplega fermeters svæði á herbergisveggnum mínum...

Bóndi er bústólpi

2006-03-14T23:52:00.000Z

Ekki svo skarpur

2006-03-05T23:21:00.000Z

Sökum heilsufarsástæðna hef ég ákveðið að tjá mig ekki neitt um álver eða Húsvíkinga í þessari færslu.

Síðustu vikur hefur Gelgjan tekið sér bólfestu í mér með þeim afleiðingum að ég hef átt mitt annað heimili í New Port, Orange County, California. Fyrir ykkur landsbyggðarfríkin er það sögusvið þáttanna The OC. Merkilegt hvað ég er búin að eyða miklum tíma í sjónvarpsgláp (tölvuskjásgláp) síðustu vikurnar. Fyrst heil vika á County General og svo þarna í Californiu. Ég er ekki hætt því í kvöld gaf ég mér tíma til að horfa á Kroniken. Danskir framhaldsþættir eru oftar en ekki afar frambærilegt sjónvarpsefni og Kroniken er þar framarlega í flokki! Þar sem ég er nú stúdent í dönsku, prófaði ég sjálfa mig í skilningi og ég skildi bara glettilega mikið þegar ég horfði ekki á textann. Það er kannski bara spurning að sparka raufsaranum og fara bara að selja pylsur á strikinu í staðinn: Ja, vil du har en pølse med alle?

Kjánahrollur helgarinnar kom án efa þegar ég datt óvart í mánaðarskammt af Skarpi. Mánaðarskammtur er of stór skammtur! Og ég get lofað því að næsta tölublað verður ígildi 3 mánaðarskammta þar sem það verða án efa nánar umfjallanir um það tvennt sem ég ætla ekki að tala um í þessari færslu...

Er þetta tilviljun, eða...?

2006-03-01T08:41:00.000Z

Stjórnmálaþurs

Þú ert vanaföst, tilfinningarík félagsvera.
Í margmenni á stjórnmálaþursinn oftar en ekki orðið. Ef einhver hyggst grípa fram í fyrir honum talar hann bara hærra - og það virkar. Hann hefur sterkar skoðanir á flestu, hvort sem um er að ræða fjárlagahalla ríkisins eða það hvort SS eða Goða pylsur eru betri, og gerir hvað hann getur til að þröngva þeim upp á aðra. Stjórnmálaþursinn þarf að passa sig þegar hann er í nærveru þeirra sem eru ósammála honum því blóðþrýstingurinn á það til að rjúka upp.

Stjórnmálaþursinn vantar ekki nýja skó fyrr en það er komið gat á þá gömlu... sem skósmiðurinn segist ekki geta gert við. Stjórnmálaþursinn veit hvar Guðsteinn er með verslun.

Hvaða tröll ert þú?

Hvaða Guðsteinn...?

Í alvörunni talað!

2006-02-27T21:25:00.000Z

Góðir gestir þessarar síðu. Ég get ekki lengur haldið skoðunum mínum fyrir sjálfa mig. Þarf reyndar að vinna í því að finnast mínar skoðanir vera þær einu réttu... Í þessu tilviki hérna er öruggt hverjar mínar skoðanir eru.

Ekkert álver á Norðurlandi! Takk fyrir pent.

Hvet alla sem mér eru sammála til að láta ekki sitt eftir liggja!

You set the tone...

2006-02-22T21:30:00.000Z

Í kvöld kvöddu íslendingar vin sinn til margra ára. Ég var mjög náin honum og sé mikið eftir honum. Ég hef þekkt hann mjög lengi og samband okkar var gott. Ég þori varla að vona að allt verði samt án hans! Þökkum guði fyrir að ég var forsjál og á hann á bandi (fleiru en einu og fleiru en tveimur...).

John Truman Carter

Ég reiknaði það svona lauslega út um daginn hvað ég hef eytt mörgum dögum af ævinni í Bráðavaktargláp og ég held ég haldi þeirri tölu bara fyrir sjálfa mig - hún var yfirgengilega há!

Börn byltingarinnar

2006-02-22T14:03:00.000Z

Í dag er ég villt! Í dag skrópa ég í tíma fyrsta skiptið á ævinni. Í dag mótmæli ég! Dagurinn í dag er sem sagt búinn að einkennast af mótmælum og sameiginlegum skrópum í mótmælaskyni við fyrirhugaði styttingu náms til stúdentsprófs. Það hvarflaða aldrei að mér að sleppa því að mótmæla því ég vildi ekki fá fjarvist - ég stend og fell með mínum málstað! Ég vona bara að afgangurinn af bekknum haldi það út og mæti ekki í dag, því mótmælin eru ekki búin þó að dagskráin sé búin!

Tónó á eftir, seinasti ER og skemmtinefndarkvöldvaka í kvöld og Njálupróf á morgun!

Fyrsta myndin sem birtist á þessu bloggi. Ég held að það sé við hæfi að hafa hana af mér og INTM(Icelandic next top model).

Arna Rebel

Klukk smukk

2006-02-18T20:15:00.000Z

Í dag gerði ég hið ómögulega. Ég keypti mér bæði brjóstahaldara og gallabuxur. Þetta tvennt reynist mér (og reyndar mörgum öðrum) oft erfitt að finna og kaupa. Þetta gerði ég ein og á svona klukkutíma. Var svo stolt þegar ég hringdi í mömmu þegar ég komin heim.
Annars hef ég ekkert betra að blogga um en þetta nýjasta klukk.

4 störf sem ég hef unnið um ævina:

Barnapössun í Höfða
Barnapössun/heimilishjálp hjá Leifi og Gunnu
Búðardama í Strax Reykjahlíð
Starfstúlka í Veiðiheimilinu Hofi.

4 bíómyndir sem ég get horft á aftur og aftur:

Bring it on
Sense and sensebility (hef ekki "keine" hvernig á að skrifa það)
Bend it like Beckham
Karlakórinn Hekla

4 staðir sem ég hef búið á:

Grænavatn 4
Herbergi 4106, Lundi
Suðurbyggð 4 Akureyri
Þar sem mamma hefur búið (Helgamagrastræti, Lundur.)

4 sjónvarpsþættir sem ég horfi á:

ER
Sex and the city
Friends

4 síður sem ég skoða daglega utan við blogg:

muninn.is
ma.is
mbl.is
leikjanet.is

4 staðir sem ég hef heimsótt í fríum:

Þýskaland
Danmörk
London beibí
Mýrdalur

4 gerðir af mat sem mér líkar:

Lamkjöt af öllum stærðum og gerðum
Mexíkanskur matur (Tortillas, taco)
Kjúklingur
Stórar óhollar tertur

4 staðir sem ég vildi heldur vera á núna:

Heima hjá pabba, Hrólfi og ömmu
Fyrir sunnan hjá mömmu og Brynju
Í sturtu
Mér líður nú líka bara ágætlega þar sem ég er núna...

Ég ætla ekki að klukka neinn sérstakan en ef einhver hefur brennandi áhuga er honum hjartanlega velkomið að taka það til sín. Á morgun ætla ég að sýna ykkur mynd af öllum fínu afmælisgjöfunum mínum. En núna ætla ég að fara að kjósa Silvíu og fara að taka mig til fyrir Sjallann beibí! Já og ég verð að koma því að að ég elska Tomas Lundin! Og ég elska líka svona Júróvósjóntímabil!

Arna átján.

Barnahjal

2006-02-15T23:46:00.000Z

Núna eru aðeins tæpar 5 mínútur eftir af löglegri tilvist minni sem barn. Eftir 5 mínútur verður kerfið farið að líta á mig sem fullorðinn einstakling. Einstakling sem á sig sjálfur. Einstakling sem má kjósa og gifta sig hvaða Raufsara sem er án þess að spurja kóng eða prest. Ég tel nú reyndar ekki miklar líkur á að gifting sé á næst leyti en ég þarf allavega ekki neitt samþykki annað en mitt, já og líklega brúðgumans. Ég get samt lofað mömmu og pabba að þau eiga ekki eftir að finna mun á mér, þau hafa sko ekki losnað við mig. Mér finnst nefninlega gaman að vera barn.
Barnið Arna og ég sjálf erum ekki tilbúin að kveðjast svo ég hef boðið barninu að búa í mér um ókomna framtíð og það þáði það með þökkum. Barnið Arna hefur reyndar gert og sagt ýmislegt sem mig langar ekki mikið að muna eftir en barnið Arna hefur líka átt sína góðu stundir sem eru þess virðu að halda í það.

Barnið Arna kveður í síðasta sinn - að eilífu!

Lopasokkar eru lífið

2006-02-12T02:37:00.000Z

Ég ligg uppi í rúmi og er að borða nammi sem ég gleymdi að væri til. Er til betri leið til að enda alveg hreint ágætan laugardag? Vaknaði heima en kom inneftir seinni partinn og fór síðan í mat til Guðjóns. Hann eldaði alveg rosalega góðan mat og ég er búin að sjá það að ég get ekki boðið krökkunum til mín í mat því það eina sem ég kann að elda er eggjabrauð og pastasósa... Ég stenst klárlega ekki samanburðinn.
Ég get ekki ákveðið hvað mér finnst um það að verða 18. Stundum finnst mér það bara vera fínt og ekki skipta neinu máli en stundum fæ ég kvíðaköst og skrifa undir afsal af mér til mömmu svo hún geti ráðskast með mig langt fram yfir 18 ára afmælisdaginn minn.
Það er svo gaman þegar maður er einn í heiminum. Þetta gerist yfirleitt þegar ég er á leiðinni í tónlistarskólann með tónlist í eyrunum. Það er reyndar verra ef einhver verður vitni að einhverfu manns. Það var til dæmis í gær þegar ég hélt að ég væri ein og byrjaði að "úúú-a" með laginu sem ég var að hlusta á, en gékk þá ekki einhver villuráfandi sauður fram hjá mér. Hann lét nú ekki á neinu bera, enda ekki víst að hann hafi heyrt neitt nema óvænta hóstakastið sem ég fór í snögglega eftir að ég varð hans vör. Þetta hafði nú ekki meiri áhrif á mig en það að áður en langt um leið var ég aftur farin að veiða snjókorn með tungunni.
Merkilegt hvað manni er alltaf brugðið þegar maður kemst að því að einhver er svo miklu villtari en maður bjóst við. Í dag var það hún amma sem kom mér á óvart með að spurja hvort Hrólfur væri eitthvað sorrý! Mér hafði ekki einu sinni dottið í hug að þetta orð væri til í orðabókinni hennar svo að ég svo að ég man ekki einu sinni hverju ég svaraði. Það hriktir í traustustu stoðunum þegar amma slettir. Það er því með óttablandinni tilhlökkun sem ég velti því fyrir mér hvað hún segir, næst þegar ég hitti hana.

Kannski ég gefi sjálfri mér klippingu í afmælisgjöf...

Ég þoli ekki þegar...

2006-02-03T19:16:00.000Z

...íslendingar fara vælandi til Washington til að biðja um fjórar herþotur verði ekki fjarlægðar af Keflavíkurflugvelli. Hvað í andskotanum gagnast þær okkur. Við höfum engin not fyrir neitt nema þá helst þyrlurnar þeirra en samt erum við vælandi við fætur stórkarlanna, biðjandi þess að helvítis þoturnar fari ekki. Ég hef greinilega meiri trú á Íslendingum en stjórnvöldin í landinu því ég hef fulla trú á að Íslendingar geti sjálfir séð um allt sem er nauðsynlegt. Held það sé ekki í lagi!
...álver á Norðurlandi er það eina sem kemst inn í hausinn á fólki. Álver er ekki það sem Norðurland þarfnast! Mér finnst álver afskaplega gamaldags í hugsun og verð brjáluð þegar heyri minnst á að þrír staðir á Norðurlandi séu að berjast um að fá álver! Og hvað sem ég hef út úr mér látið um Húsavík þá er mér þó það annt um staðinn að mér finnst hann ekki eiga skilið að það verði dritað á hann álveri! Sveitarstjórn Þingeyjarsveitar er samt bandamaður minn því þeir vilja ekki sjá háspennulínur þvers og kvurs um alla dali!
...gömlu skólabækurnar mínar eru ekki teknar uppí þegar ég kaupi mér nýjar. Sit uppi með fokdýra sögubók og önnur verðmæti og borgaði 11000 fyrir fjórar bækur. Eins gott að Brynja var sauður og seldi ekki nokkrar af sínum bókum sem gagnast mér núna, því annars færi ég á hausinn!
...ég ætla að elda handa pabba og Hrólfi og svo er bara ekkert til að elda úr. Ætlaði að búa til pastasósu áðan en þá voru tómatdósirnar búnar svo það var bara kakósúpa í matinn.

Ég elska þegar...
...ég sofna suðri á Holti. Ekkert eins gott að vera í hlýjunni inni í stofu að tala og svo slökknar bara á manni.
...þegar ég man ekki að ég á nammi/pening og svo finn ég það fyrir tilviljun.
...mér gengur vel í tónlistarskólanum!
...ég hugsa til þess að ég ætla í klippingu í næstu viku.
...mér finnst gaman að hugsa um að ég sé að verða 18. (sem er alls ekki alltaf...)

Arna sem er nývöknuð, ákveðin en mest af öllu bitur út í heiminn!

Life is a tale

2006-02-02T16:37:00.000Z

Ég er búin að setja í þvottavél, var að taka kökurnar út úr ofninum og ætla að fara að skella í þurrkarann. Þetta æði getur stundum runnið á mann en orakast oftast af nauðsyn. Ég setti til dæmis í þvottavél svo að ég myndi ekki þurfa að fara í náttfötunum í skólann á morgun. Kökumixið fékk ég sent frá Íslandsbanka. Með kökunum var bréf um það hvað maður á ekki að gera þegar maður verður 18. Með því að borða kökurnar er ég því eiginlega að samþykkja að ganga ekki í ábyrgð fyrir einhvern óábyrgan. Vonandi er ekki dáleiðslulyf í kökunum sem lætur mann flytja öll sín viðskipti í Íslandsbanka, mér líður vel í Sparisjóði Suður-Þingeyinga.

Áfram Ísland!!!

Arna hlær að sjálfs sín fyndni

2006-01-31T20:49:00.000Z

Í u.þ.b. viku er ég ekki búin að gera neitt. Ég hef farið seint að sofa, seint á fætur og ekki afrekað mikið. Ég keypti reyndar 5 boli, fór í leikhús og af og til uppeftir til ömmu. Svo hef ég farið þrisvar á dag inn á INNU til að gá hvort stundataflan mín sé komin. Hún kom í dag og ég væri að ljúga ef ég segði að hún væri fín. Ég er nánast eins mikið í skólanum og boðið er uppá. Byrja alltaf klukkan 8 og er þrjá daga til 4. Engar eyður.En að öllum ólöstuðum held ég að 2. sería af ER (eða Akutten, eins og hún heitir á norsku) hafi haldið á mér gegnum fríið. Hún er búin að vera mín stoð og stytta og svíkur mig aldrei!

Ég veit að Hrólfur yrði stoltur ef hann vissi hvað ég er búin að haga mér vel. Tímabilið er bara búið að fara ljúflega með mig og ég er aldrei búin að fá blóðnasir. En það er ekki búið - langt því frá! Erfiðir leikir eftir og ég gef ekkert eftir!

Mér finnst gaman að telja niður. Á morgun eru 11 mánuðir síðan ég fékk bílpróf, á hinndaginn eru 2 vikur þangað til ég verð 18, á morgun eru líka 5 mánuðir í að Brynja verði 23 og á hinndaginn eru 5 mánuðir í að stefnumót mitt og Hróbjarts Vilhjálmssonar fari fram í Gautaborg. Maður getur alltaf fundið eitthvað til að hlakka til!

Benni Hemm Hemm

2006-01-25T23:52:00.000Z

Það er komið að því! Það er komið að:

Óhóflegum æsingi sem jafnvel leiðir til blóðnasa.
Tvöföldum óhóflegum æsingi, ef kók er haft við hönd.
Sigurgleði, í formi óviðráðanlegra hljóða og hreyfinga.
Tapsæri, sem kemur fram í rembingi við að láta ekki sjást á sér að maður sé tapsár.
Endalausri þjóðerniskennd.
Undarlegum eignarrétti á 16 einstaklingum.
Uppáhaldstíma mínum á árinu!
Ekki uppáhaldstíma Hrólfs á árinu.
Því að Arna fari endanlega yfir um!

EM byrjar á morgun!

P.S: Mér finnst gaman að segja Benni Hemm Hemm!

Hóm svít hóm

2006-01-25T15:09:00.000Z

Það var svo kalt uppi í herbergi þegar ég fór að sofa í gær. Það blés í gegnum gluggan, þó hann væri lokaður. Ég var bara með þunna sæng en var með teppi ofan á henni. Ég var í sokkum en allt kom fyrir ekki, ég gat varla hreyft mig fyrir kulda. Svo vaknaði ég um þrjúleitið í nótt með andlitið klesst á blaðinu sem ég sofnaði út frá og var ennþá kalt. Ég slökkti ljósið og sofnaði aftur og þegar ég vaknaði í morgun var mér ótrúlega heitt. Skil ekki svona öfgar.

Ég er víst ekki alveg fullkomin...

2006-01-23T17:29:00.000Z

Ég var að koma frá tannlækni og það var verið að gera við einu skemmdina sem ég hef nokkurn tímann fengið. Þar af leiðandi er ég alveg dofin öðru megin í munninum og lifi í stöðugri hættu um að annað hvort bíta í eða gleypa tunguna í mér. Síðan ég kom heim er ég búin að stunda miklar rannsóknir á því hvað ég sé dofin langt út á andlit og hvað ég geti eiginlega togað vörina á mér langt. Ég hef bara einu sinna áður verið deyfð og ætla því að gera eins miklar rannsóknir núna og unnt er.
Síðasta próf er á morgun og til að fagna því er ég að hugsa um að kaupa mér myndavél til að taka mynd af fríinu mínu. Ég ætla líka heim að spila púkk og svo fer ég suður á fimmtudaginn. Um daginn var ég að tala um að ER væri minn læknaþáttur og ég vildi ekkert Strong Medicine kjaftæði. Ég er ennþá sammála því en núna er Grey's Anatomy uppáhalds nýji þátturinn minn. Svona hæfileg blanda af sjúkdómum, alvöru og rómantík. Þorrablótið um helgina var mjög skemmtilegt eins og við var að búast. Gettu betur klukkan hálf 8: Áfram MA!
Arna - með slef niður á bringu!

Dagur í lífi Lappa

2006-01-19T14:23:00.000Z

Það var rosa gaman hjá mér í gær. Ég fór með Sigga í sveitina í fyrradag og í gær þegar við komum heim fórum við beint í hesthús. Ég skemmti mér konunglega og gelti eins og mófó og hljóp út um allt og pissaði utan í marga staura og lyktaði af mörgum skítahrúgum. Þegar ég kom heim úr hesthúsinu slappaði ég af og laggði mig í sófann í nokkra tíma. Ég fékk að fara með Örnu þegar hún keyrði Sigga niður á höfn. Það var rosa gaman og á leiðinni heim sá ég hund í bandi og hló að honum. Þegar Arna var búin að leggja bílnum og komin út sá hún að hún hafði gleymt að slökkva ljósin og opnaði bílinn aftur og teygði sig í ljósin. Á meðan var ég alveg ótrúlega sniðugur og hljóp af stað út Suðurbyggðina. Arna kom reyndar hlaupandi á eftir mér, kallandi á mig en ég heyrði ekki orð af því sem hún sagði. Ég var of upptekinn við að lykta af hverju einasta horni og spræna aðeins hér og þar. Ég hljóp áfram Byggðaveginn, fram hjá Súper og alveg út að Þingvallastrætinu. Ég var að taka beygjuna upp Þingvallastrætið þegar ég sá óásprænt horn í hina áttina og snéri því við. Ég sá Örnu snúa líka við og hlaupa á eftir mér en ég hélt að hún væri bara í heilsuræktarhlaupi og nennti ekkert að vera að púkka upp á hana. En þegar ég var komin að Vanabyggðinni stoppaði ég og horfði út í loftið þegar Arna kom til mín. Hún var frosin í framan og svo kafmóð að hún kom ekki upp orði svo ég ákvað að fara til hennar og gá hvort það væri ekki allt í lagi. Þá bara tók hún í hálsólina mín og leiddi mig alla leiðina heim. Ég varð pínu fúll, því ég er stór strákur sem þarf ekkert að leiða en Arna hlustaði ekki þegar ég var að reyna að segja henni það. Þegar við komum svo heim skammaði Arna mig pínu og ég var pínu sorrý og fór í hornið mitt. Svo þegar ég fór til Örnu og ætlaði að láta hana klóra mér pínu var hún enn fúl því að hún hafði misst af öllu nema 5 mín af ER. Ég skil ekki af hverju hún var fúl, hún hefði ekkert þurft að fara út að hlaupa þegar hún vissi að ER var í sjónvarpinu.

Litli Prinsinn, a.k.a Lappi "Gabríel" Erlingsson

Stæ 403 here I come!

2006-01-16T22:25:00.000Z

Ég held ég sé skitsó/einhverf/allsvakalega þroskaheft. Miklar einverur mínar undanfarna daga eru farnar að segja til sín. Ef einhver myndi sjá til mín myndi hann halda að ég væri nýsloppin út. Ég hlæ, skelf og tala við sjálfa mig (eða Lappa) um stærðfræði. Ég er algjörlega óhæf í að tala um eitthvað annað en stærðfræði, nema þegar ég tala um Lappa, því ég er orðin eins og óþolandi mamma sem talar ekki um annað en barnið sitt og í þessu tilviki er Lappi barnið mitt. Flestar setningar mínar þessa dagana byrja á: "Veistu hvað Lappi gerði...". Ég stóð líka sjálfa mig að því að tala um mig í þriðju persónu. Ég hélt að það gerðu bara óþolandi mæður. Ég sagði við Lappa að ég gæti ekki leikið því "Arna" þyrfti að læra. Held það sé ekki allt í lagi. Eins gott að það er bara próftíð tvisvar á ári.

Farin í bað að hreinsa andann (og líkaman) fyrir ógnina ógurlegu.

Ég og sjónvarpið, tölvan og ég

2006-01-11T12:38:00.000Z

Enn ein tæknialdan reið hér yfir í gær þegar þráðlausa netið var tengt. Nú þarf ég ekkert að læra í prófatíð. Ég get bara hangið á netinu, horfi á sjónvarpið og borðað smákökur, eftirlitsslaus... Búin með eitt próf af átta og gékk bara ágætlega. Finnst eiginlega ekki að ég sé byrjuð í prófum, ég er eitthvað svo róleg.

Horfði á einn svona Strong medicine þátt áðan og ég verð að segja að ég held ég haldi mig bara við mína Bráðavakt. Þegar maður er komin í svona náin kynni við einn spítala er erfitt að kynna sér starfshætti á öðrum... Sko Bráðavaktin getur nú verið dramatísk en þessi þáttur var jafnvel enn dramatískari. Önnur aðalkonan var að skilja af því að kallinn hennar barði hana og dóttir hennar var í bakaðgerð til að losna við bakspelkur og hin aðalkonan var í klessu vegna þess að maðurinn sem hún var nýbúin að átta sig á að hún elskaði var skotinn í hausinn og varð heiladauður og um leið dó barn sem hún var búin að sinna í meira en ár. Þetta hefði nú tekið a.m.k. þrjá þætti í ER.

Jæja líklega best að drullast til að lesa Gylfaginningu og málsöguna, eða læra kannski læra sannanir í stærðfræði, eða kannski bara vera í tölvu og horfa á sjónvarpið...

Æ, ég veit það ekki

2006-01-05T10:28:00.000Z

Í morgun gerðist sá einstæði atburður að ég svaf yfir mig. Ég hef uppi kenningar um að ég hafi verið í dái því ég hef engar minningar um að hafa nokkurn tímann heyrt í neinni klukku, hvað þá slökkt á henni. Sigga vakti mig rétt fyrir hálf 9 svo ég missti bara af einum enskutíma. Svo var lífsleiknitíminn bara stuttur þannig að dagurinn á eftir að verða heilanum nokkuð ljúfur.

Kvefhelvítið hefur fundið sér leið gegnum fíleflda varnargarða mína og er að hreiðra um sig í efri hluta líkamans. Mér finnst tilhugsunin um kvef í prófum ekkert skemmtileg. Ég veit ekki heldur alveg hvort það er gott eða ekki að vera mikið einn heima með stöð 2 og stöð 2 bíó í prófunum. Því fyrir manneskju sem hefur alist upp við eina sjónvarpsstöð er það að fá stöð 2 eins og það væri ókeypis í nammilandi. Elli og Sigga eru að fara til Kanarí og á meðan verðum við Kári ein heima með Lappa og hestana. Held að það sé ekkert nema gott til að líta aðeins upp úr bókunum.

Ég fer heim á morgun til að vera við jarðarförina hennar Dobbu og þegar hún er búin fer ég aftur til Akureyrar. Það var allaveganna planið áður en ég komst að því að ég hafði talið sjálfri mér trú um að söguprófið væri fyrsta próf og ég þyrfti að lesa sögu alla helgina. Söguprófið er næst síðasta prófið þannig að ég held að helgin endi með einhverju allt öðru en planað var.

...og aldrei það kemur til baka

2005-12-31T16:12:00.000Z

Jahá... þá er þetta ár að renna sitt skeið. Veit ekki alveg hvað gerðist á því, finnst eins og það hafi ekki gerst mikið. Ég er reyndar komin í annan bekk og komin með bílpróf en það er varla mikið meira. Auðvitað gerðist ýmislegt skemmtilegt en það var ekkert meira eða minna en venjulega!
Í augnablikinu sé ég bara svörtu hliðina, þ.e. árið 2005 sé árið sem Hrólfur byrjaði í mútum og árið 2006 árið sem ég verð 18 ára!

Ég trúi samt ekki öðru en að árið verði bara ágætt að öðru leiti og ég vona að allir sem þetta lesa skemmti sér vel í kvöld og eigi hamingjuríkt ár!

You and your shoe-eating dog!

2005-12-29T01:56:00.000Z

Jólin eru búin. Þau eru búin að vera afskaplega venjuleg jól. Ég held áfram að sannreyna kenningu mína um að magaapparatið í mér viti ekki seddi er fyrr en það er orðin of mikil seddi... Fékk fínar jólagjafir: mínar venjulegu 4 bækur, geisladisk, náttföt x 2, baðsloppur, vesti, sjal, eyrnalokka, vettlinga x 2 og mp3. Ein af bókunum sem ég fékk var Afturelding eftir Viktor Arnar Ingólfsson. Var í mínu mesta sakleysi að klára hana í fyrradag þegar atburðarrásin leiddi mig í skotleik í Dimmuborgum sem gékk út á það að tveir menn fara sitthvorn hringinn í Dimmuborgum, í myrki, og eiga að reyna að skjóta hinn. Get ekki sagt annað en að ég hafi breitt sængina aðeins betur yfir eyrun og heitið því að fara aldrei í Dimmuborgir í myrkri...

Ég er ekki frá því nema að bíóferðin sem ég fór í í gær toppi bíóferðina sem ég fór með Magneu í haust. Ég ætlaði með mömmu, Hrólfi og Inga á Harry Potter kl 8 í Kringlunni. Þegar við vorum búin að standa í röð í ágæta stund komumst við loksin að til að komast að því að það hefði verið rugl í blaðinu, Harry Potter væri bara sýnd niðri í Álfabakka. Við hlupum út í bíl brunuðum niður í Álfabakka og stóðum þar í enn lengri röð en í Kringlunni. Það var ekki til neins nema komast að því að þar var orðið uppselt á dear Harry en okkur var boðið að kaupa miða á 10 sýningu í Háskólabíói sem við þáðum. Bíóferðin tók rúman 5 og 1/2 tíma.

Ég er farin að halda að allt þetta S.A.T.C gláp mitt undanfarið sé farið að hafa alvarlega áhrif á mig. Ég var ofsótt af S.A.T.C. leikurum í sjónvarpinu í kvöld. Byrjaði allt með Miröndu sem fékk heilablóðfall í E.R., svo var Trey hennar Charlott brjálaður kall í Law and order- SVU og allt endaði þetta með henni Söru Jessicu í Jay Leno. Krípí eða?
(S.A.T.C, E.R, SVU...? How cool am I?)

Gleðileg jól

2005-12-24T11:45:00.000Z

Í morgun vaknaði ég við hið eina sanna jólaveður úti - eða ekki! Það var slagveðursrigning sem buldi á húsinu og tók burt allan snjóinn sem við vorum búin að safna í gær og fyrradag. En það verða jól þrátt fyrir snjóleysi.
Við erum annars bara frekar róleg hérna megin, búin að öllu nayðsynlegu og aðeins matarsnatt eftir. Brynja fær að því virðist steikarpott í jólagjöf og er víst hamingjusöm upp fyrir haus.

Ég vil bara óska öllum sem þetta lesa gleði- og hamingjuríkra jóla, hvort sem þeir eru á Íslandi, London eða Spáni. Hafiði það sem allra best.

Jólakveðja Arna

Ef ég nenni

2005-12-18T15:42:00.000Z

Vá mér fannst vera svo langt síðan ég komst síðast á netið, það voru 2 dagar. Er búin að vera meira og minna ein heima, tölvu- og inneignarlaus og vorkenna sjálfri mér. Er reyndar búin að skrifa nokkur jólakort, horfa á ríginn og taka smá til líka. Ég var svo glöð þegar ég skilaði ritgerðinni í hólfið á föstudaginn. Þá var ég líka búin að kynna dönskuverkefnið, fara í enskupróf og skila heimadæmunum.

Fór í mat til Eyglóar á fimmtudaginn og það var voðalega fínt. Hún kann sko að halda boð. Svo var ég næstum því dáin á Glerártorgi á föstudaginn - jólagjafakaup og margmenni fara ekki vel í mig. Nú þegar það er búið að ákveða allar gjafirnar er enn eftir ein ákvörðun áður en jólin mega koma: Í hverju á ég að vera? Efast reyndar um að jesúbarnið fresti fæðingu sinni út af svona smávægilegu vandamáli.

Ég var búin að gleyma hvað mér finnst gaman að skrifa jólakort - maður rifjar svo margt skemmtilegt upp!

Það er draumur að vera með dáta

2005-12-12T10:08:00.000Z

Bara vika eftir af skólanum. Ein ritgerð, heimadæmi, hópverkefni og 2 enskupróf eru líka eftir en það reddast. Það reddast alltaf allt á endanum.

Dagurinn í dag á örugglega eftir að einkennast af því sem hann byrjaði á. Vaknaði aðeins of seint. Átti engin hrein föt, fann ekki varasalvann minn, hárið stórfurðulegt og svo fékk ég mér vínarbrauð á hlaupunum út! Getur þetta endað vel?

Minn sáttmáli við guð um þúsund ár

2005-12-08T23:43:00.000Z

Ég er ekki týpan sem segir að uppáhaldsbækurnar sínar séu Sjálfstætt fólk og Salka Valka og að þær hafi verið lesnar fyrir fermingu. Ég hef aldrei lesið bók eftir Halldór Laxness og í augnablikinu langar mig ekkert til þess. Ég býst nú við að eiga einhvern tímann í framtíðinni eftir að geta tjáð mig um bækurnar hans en þangað til ætla ég að tjá mig um ljóðin hans. "Hvert örstutt spor" er til dæmis alveg fínasta ljóð með fínu lagi. Ég stalst til að ljósrita nóturnar af því niðri í tónó því ég veit ekkert hvort Sigga vill að ég syngi það. Annars nægir mér að gaula það bara fyrir hundinn.

Mig er lengi búið að langa til að bæta einu atriði á klukk listann minn yfir atriði sem ég ætla að gera áður en ég dey og það er að syngja með Garðari Thor Cortes! Lýðurinn tryllist, salurinn fyllist! Arna og Garðar - together again! Nei ég segi svona. En væri það ekki draumur...?

Tvisvar í þessari viku er ég búin að drífa mig niður í tónó til að fara í söngtíma og viti menn - Sigga er lasin. Ég lít nú venjulega á forfallatöfluna til að gá hvort svo ólíklega vildi til að hún skuli hafa forfallast en auðvitað sjá æðri öfl um að maður gerir það ekki, einmitt þegar hún er ekki!

Ekki nema rúm vika í jólafrí en enn læt ég eins og önnin sé rétt að byrja og langt til jóla. Nógur tími til að vinna allt upp sem maður er búin að slugsast með hingað til! Er þetta afneitun eða...?

Katla stendur fyrir sínu

2005-12-04T21:04:00.000Z

Ég lennti ekki bara í sköflum í gær - ég lennti líka í vottum. Hvað er það sem fær fólk til að fara upp í sveit og troða trú sinni upp á annað fólk. Ég var búin að sjá einhverjar konur fara í húsin í kringum mig en þær stoppuðu ekki lengi á hverjum stað. Svo komu þær og bönkuðu hjá okkur. Þær höfðu gríðarlegan áhuga á að vita hvort ég hefði áhyggjur af framtíðinni og hvort ég vildi ekki kynnast einhverjum sem hlustaði alltaf, hefði áhuga og gæti hjálpað. Ég reyndi nú að segja þeim að mér finndist það ekki vera þess virði að velta mér upp úr því hvort ég gæti orðið fyrir barðinu á náttúruhamförum. Þá herptust varirnar á konunni og hún sagði fornemuð að þetta væru nú samt staðreyndir. Þegar ég hélt að ég væri nú að losna við þær spurðu þær hvort það byggi einhver á neðri hæðinni. Ég þorði ekki að ljúga að þeim því að þær höfðu örugglega séð ömmu í eldhúsglugganum. Þegar þær bönkuðu svo hjá ömmu var hún á salerninu og þær fóru. En nei, það dugði þeim ekki því í dag komu þær aftur en amma greyið náði að koma í veg fyrir það að þær kæmu inn og sagði þeim bara sína skoðun.

Farin að horfa á reestina af Erninum

Vetur - vetur - vetur

2005-12-03T14:33:00.000Z

Mér sýnist allt stefna í almennilegan vetur hér á norðuhjaranum. Ég er allavega búin að lenda í alls konar snjó-ævintýrum seinasta sólarhringinn. Byrjaði allt með því að seint í gærkvöldi fór ég niður í Gautlönd. Það var hríð og snjór á veginum. Ferðin gékk samt ótrúlega vel. En þegar ég ætlaði heim í nótt endaði það samt ekki eins og áætlað var. Guðjón og stelpurnar voru í bíl á undan mér og þau komust ekki langt áður en þau stoppuðu og komust ekki lengra. Við vorum með miklar spekúleringar um það hvað væri best að gera, reyna að koma mínum bíl á undan eða bakka bílunum alla leiðina til baka. Ragnhildur koma á jeppanum á eftir okkur og við fórum í skoðunarferð upp á Ása og ákváðum að fólksbílarnir kæmust þetta ekki, svo að við fórum bara inn aftur. Þegar þarna er komið við sögu var klukkan um hálf þrjú. Mér var svo kalt á fótunum því ég var ekki í neinum snjófötum. Svo kom Eddi og sótti Guðjón og hans stelpur en ég gisti hjá Ragnhildi og hennar stelpum.

Þá er snjó-ævintýrum mínum ekki lokið því í dag þegar við ætluðum út í sveit að hitta krakkana í íþróttahúsinu lentum við í öðru. Það var ekki búið að blása ásana en ég var nú næstum því alveg búin að komast alla leið út á þjóðveg þegar ég stoppaði og komst ekki af staf aftur. Ragnhildur, Magnea og Eygló voru á jeppanum á eftir mér og í sameiningu reyndum við öll trikk sem við kunnum. En aldrei komst bíllinn af stað. Þá komu Baldar og redduðu málum. Tóku við stjórn á vettvangi og við komumst út á þjóðveg.

Nú eru eflaust allir sem halda að öllu hafi verið bjargað þegar við komum út á þjóðveg og það var næstum því rétt. Ég þurfti að koma við hérna heima áður en ég færi út í Reykjahlíð og sagði stelpunum að þetta væri ekkert mál ég kæmist þetta alveg þær skildu bara drífa sig. Mér gékk ágætlega nema þegar ég kom á Holtið stoppaði ég aðeins og komst ekkert af stað aftur. Einar og Kristinn komu að hjálpa mér og svo pabbi og á endanum komst bíllinn í hlaðið og hefur ekki hreyft sig síðan.

Ég er aftur á móti að hugsa um að fara bara upp í rúm, lesa Harry Potter og fara ekki á fætur aftur fyrr en í vor. Eða kannski kíki ég fram úr þegar það er búið að skafa...

Ja hérna hér

2005-11-26T15:34:00.000Z

Haldið ykkur, haldið ykkur fast! Ég, Arna Hjörleifsdóttir, er rétt komin frá Húsavík. Það gerist nú ekki oft. Nú eru eflaust margir sem eru að velta því fyrir sér hvort ég hafi þurft að hitta lækni eða sýslumanninn. Ég þurfti nú hvorugt, ég var að heimsækja hana Sigrúnu ömmusystur mína á sjúkrahúsið.

Landsleikur í handbolta á eftir. Þetta er nú reyndar bara vináttulandsleikur en það breytir því ekki að ég á eftir að missa mig í æsingi. Sem betur fer er ekki til kók, þá myndi enginn þora að horfa á leikinn með mér. Fyrir þá sem er ekki kunnugt um handboltaástand mitt þá myndi ég ekkert vera að kynna mér það - ég er sjálfri mér og öðrum hættuleg!

Acos(v) + Bsin(v)= C

2005-11-25T19:05:00.000Z

Ég var í stærðfræðiprófi í dag og sannaði þessa reglu. Annars veit ég ekkert hvernig mér gékk. Vonandi vel! Nóg að gera eins og venjulega! Ég er komin heim. Harry Potter er frumsýnd í kvöld. Ég geri ekki þau mistök að fara aftur í bíó á frumsýningardegi, af ótta við að vera troðin undir. Ég hlakka samt svoo til að sjá myndina! Ég fann mér kjól í dag og er ánægð með hann (á leigu reyndar, en það er ekkert verra).

Stundum held ég að ég sé ein í heiminum... Ég stend mig oft að því að tauta með sjálfri mér og oft syngja þegar ég er ein að ganga. Stundum er ég líka að gera sérhljóðaprófanir á munninum á mér og þá hljóma ég eins og góður dagur á Sólheimum. Oft hlæ ég líka upp úr þurru. Svo tala ég endalaust mikið við Lappa þegar við erum bara tvö heima. Þessa dagana eru gluggar líka uppáhaldsspeglarnir mínir. Maður sér sig ekki nákvæmlega og allar misfellur hverfa og maður er alltaf sætur í þeim. Það sem er hins vegar ekki eins gott er þegar ég missi mig í trylltum dansi fyrir framan gluggana og dáist að "fimum" hreyfingum mínum. Það gerðist einmitt í gærkvöldi þegar ég missti mig í mambó hlustandi á Bogomil Font og milljónamæringa. Ég er ekki viss um að fólkið sem átti leið um Suðurbyggðina hafi fundist hreyfingar mínar eins fimar! Það sem ég nota sem spegil er nefninlega gegnsætt...

And through it all she offers me protection

2005-11-22T21:11:00.000Z

Þá er það ákveðið. Ég er búin að mæla mér mót við hann Róbert Vilhjálmsson þann 2.júlí Gauraborg í Svíþjóð. Ég fer ásamt fríðu föruneyti, Brynju, Ástu og svo verður Hildigunnur í Danmörku. Hlakka ekkert smá til. Var reyndar alltaf að skipta um skoðun um þetta í gærkvöldi. Við vorum nefninlega búnar að ákveða að fara að sjá hann Róbert í Kaupmannahöfn en þessir danir kunna sig ekki og keyptu alla miðana. En við létum danskan dónaskap ekkert stoppa okkur og leituðum bara til Svíþjóðar sem er ekki verra því aldrei hef ég komið þangað! Brynja hringdi nokkrum sinnum í mig í gærkvöldi. Fyrst til að segja mér að það væri uppselt í Köben. Ég hugsaði að ég nennti ekki að vera að pirra mig á þessu og sætta mig bara við það. Svo eftir smá stund hringdi Brynja aftur og sagði að það væru tónleikar í Gautaborg hvort við vildum ekki bara fara á þá. Þá varð ég rosalega glöð aftur. Svo hringdi hún í þriðja skiptið og sagði að miðarnir sem væru eftir í Sví þjóð væru svo lélegir að við vildum þá ekki. Þá hugsaði ég að ég skildi ekkert nenna að vera vonsvikin. En sem betur fer hringdi hún í fjórða skiptið og tilkynnti mér að það væri búið að kaupa miða!

Ég drakk kókómjók í dag og það var allt í lagi með hana. Ég held að það hafi verið gott að ég drakk hana strax og var ekki að velta mér upp úr atvikum síðustu vikiu, því ef ég hefði geymt það þá hefði ég kannski aldrei aftur þorað að fá mér kókómjólk.

Er ekki enn búin að ákveða neitt í sambandi við árshátíðina. Ég er reyndar búin að panta mér litun og plokkun en ég er ekki viss um að það sé viðeigandi klæðnaður.

Lóðin hlaðast á mig, bamm baramm, bráðum verð ég alveg eins og þú...!

2005-11-18T11:01:00.000Z

Ég held að seinni gelgjan hafi hjálpað mér í gegnum stærðfræðihremmingar í gærkvöldi. Hvernig í ósköpum? Jú, ég var sem sagt að læra fyrir stærðfræðipróf og mér gékk ekkert sértstaklega vel - þangað til ég fann Eldhúspartý fm uppi í hillu hjá Sigga. Þessi diskur hefur ekki heillað mig hingað til svo að þetta lýsir djúpri örvæntingu minni. Á meðan ég hlustaði á gamla slagara í breyttum búningi, lærði ég bæði sannanir og reglu. Þegar eldhúspartýið var búið fann ég Best of Andrew Lloyd Webber. Ég er ekki viss um að Ella og Lappa hafi fundist þetta eins gaman og mér, því þegar maður er með heyrnartól gerir maður sér ekki alltaf grein fyrir því hvaða hljóð maður gefur frá sér...

Hrólfur á afmæli í dag, í tilefni af því ætlar hann að vera að heiman. En ég ætla heim og baka köku.

Í löngu í gær beið ég lengi í röð eftir að fá mér kringlu og kókómjólk í sjoppunni. Þegar settist svo loksins, tók ég bita af kringlunni og stóran sopa af kókómjólkinni. Það voru mistök - ég hljóp inn á bað og kúgaðist og skolaði munninn á mér lengi! Kókómjólkin var ónýt! Ég sat út löngu með fýlusvip en á leiðinni í tíma fór ég og fékk nýja. Svo þegar ég var komin í lífsleikni með kringluna og nýja kókómjólk, þorði ég ekki að fá mér sopa. Steinunn sessunautur minn var ekki með neitt pjatt og tók sopa - það voru líka mistök. Held að ég þori ekki að fá mér kókómjólk í bráð...

Pjattrófan

Fastir liðir eins og venjulega

2005-11-12T22:55:00.000Z

Aaaa það er svo gott að koma heim. Kom heim um miðjan daginn og byrjaði á þessu venjulega: Pönnukökur hjá ömmu, kaffi á Holti, leggja mig, láta pabba vekja mig í kvöldmat og horfa á Spaugstofuna á Holti. Ég lagði mig reyndar á svo undarlegum stað að pabbi var nánast búin að kalla á björgunarsveit þegar hann fann mig. Mér fannst þetta nú vera óþarfa æsingur. Ég meina, hver leitar ekki í þrönga skotinu ofan á dýnunum undir nuddbekknum, bak við teppið...?
Það er svo fyndið þegar maður er ekki búinn að koma heim í svolítinn tíma þá verður allt einhvern veginn svo betra og fallegra en mann minnti. Það verður allt manns eigin. Fjöllin mín, vatnið mitt, húsin mín. Og þegar andinn heltók mig alveg var ég farin að eigna mér tunglið.

Sigga söngkennari fer í frí bráðum og hún er byrjuð að borga okkur tímana sem við missum með því að taka okkur í tíma á laugardögum. Ég átti tíma einhvern tímann um hádegið og ákvað því að kaupa mér miða á ball í gærkvöldi. Í gær þegar ég hringdi í Siggu til að fá það staðfest hvenær tíminn væri spurði hún hvort ég gæti ekki komið klukkan hálf ellefu. Og ég hugsaði að það væri nú ekkert mál því ég þyrfti ekkert að jafna mig eftir svona böll. Þegar ég svo vaknaði klukkan hálf tíu til að sjæna mig og koma röddinni í gang. Þá sá ég að ég þurfti nú e-ð meira en 40 mínútur til að geta sungið plús það að hárið á mér var eins og öskubakki, þannig að ég sendi Siggu sms, afboðaði mig í tímann og lúrði fram að hádegi. Flott Arna!

Það var mynd í sjónvarpinu í kvöld um ungan dreng sem missir föður sinn. Til þess að mamman haldi búinu tekur strákurinn þátt í einhverrri hundasleðakeppni til að freista þess að vinna verðlaunaféð. Hinir keppendurnir eru mikli stærri og æfðari en aðalsöguhetjan... Getur einhver giskað á það hvernig myndin endaði?

Allt að verða vitlaust

2005-11-08T13:48:00.000Z

Síðasta blogg var alveg óvart... ýtti óvart á publish áður en nokkuð var komið. Er í sögu og var að fá prófið sem við tókum um daginn. Ætla ekki að segja annað um það nema að ég náði. Tónleikar í gærkvöldi. Gékk allt í lagi en mér hefur nú alveg gengið betur. Annað lagið sem ég söng er þrjú erindi. Ég byrjaði annað erindið rétt en fór síðan að ruglast og song tekstann úr þriðja erindi. Þegar ég fattaði hvað ég hefði gert, fór ég að hlægja, í miðju lagi. Flott Arna.

Hópurinn sem ég er í í lífsleikni á að skila verkefninu á morgun og við erum ekki byrjuð að neinu viti. Svo er ég í tónlistarskólanum í allan dag og get ekki unnið með þeim. Flott Arna.

Í dag, 9.nóvember, er kalt á Akureyri.

Sveitapiltsins draumur

2005-11-06T23:42:00.000Z

Já nei ég fór ekki í leikhús aftur í kvöld. Fór hins vegar í keilu með Brynju og Hildi, fékk mömmupitsu og horfði á "so you think ypu can dance". Svo var hún Ragnhildur svo elskuleg að kitla mig og ég ætla að verða við því. Upplýsingar um kitl hjá Ragnhildi.

7 hlutir sem ég ætla að gera áður en ég dey:

Læra að elda
Fara til Ítalíu
Þora að fara á hestbak
Vinna útivinnu
Vinna eitthvert sjálfboðastarf
Læra að dansa
Syngja í a.m.k. einni óperu

7 hlutir sem ég get gert:

Bakað
Prjónað
Farið upp á háa c
Sofnað við næstum því hvaða aðstæður sem er
Horft endalaust á ER
Tekið á móti lömbum
Farið ein t.d. í búðir og á kaffihús

7 hlutir sem ég get ekki gert:

Reynt að selja fólki eitthvað
Fundist gott að láta nudda á mér axlirnar
Borðað svið
Horft á fólk niðurlægja sig
Sett tunguna upp á nef
Leyst gestaþrautina á Arnarvatni
Lesið bækur eftir Helga Jónsson

7 hlutir sem heilla mig við hitt kynið:

Augun
Hárið
Flott líkamsbygging
Góð lykt
Tónlistarhæfileikar
Húmor
Fatasmekkur

7 frægir karlmenn sem heilla mig:

Johnny Depp
Björn Hlynur
Frank Lampard
Ewan McGregor
Eiður Smári
Mekhi Phifer
Guðjón Valur

7 orð sem ég segi oftast:

Jemundur minn
Pent
Sneddí
Súper
Hvað er málið
Herremíngúð
Villt

Þig getið ekki ímyndað ykkur hvað mér fannst þetta erfitt! Ætla að gera það að manngæsku minni að kitla ekki neinn! Það er líka búið að kitla flesta á mínum bloggrúntinum mínum. Nema kannski Ernu og hún má endilega gera það ef hún vill.
Ég held að Johnny vinur minn Depp sé á öllum svona listum sem ég hef séð. Pælið í því.
Er ekki ennþá búin að læra textana sem ég er að fara að syngja á þriðjudaginn, gaman á því...

Ég er mín eigin kona

2005-11-05T23:08:00.000Z

Váá... Ég var að koma úr leikhúsi með Ernu sem sér að hluta til um menningarlegt uppeldi mitt. Við fórum á Woyzech og sýningin er frábær! Örugglega flottasta sýning sem ég hef farið á! Ég er svo uppfull af leikhúshugsunum að ég er inni á midi.is að leita mér að öðru leikhúsi annað kvöld. Það er alltaf svo mikil stemning tengd því að fara í leikhús, allir svo fínir og spenningurinn sem kemur þegar ljósin dofna og þegar tjaldið er dregið frá. Í þessu verki eru líka svo margir flottir karlmenn, til að mynda Björn Hlynur. Gaman að segja frá því að í einu atriðinu óttaðist ég að hann myndi sparka ítrekað í hausinn á mér og hann spýtti ítrekað yfir mig. Minnti mig nú bara á Með fulla vasa af grjóti hérna um árið.

Ragnhildur kitlaði mig, en í kvöld er ég ónæm fyrir kitli og ætla bara að klóra mér á morgun.

Elska það þegar maður verður svo barnslega skotinn í t.d. leikurum eða íþróttamönnum að maður verður varla mönnum sinnandi ef þeir eru nefndir á nafn. Í dag hafa Björn Hlynur og Guðjón Valur þessi áhrif...

Leikhúsrottan

Háa c-ið, hér kem ég!

2005-11-02T23:33:00.000Z

Mér finnst svo gaman í tónlistarskólanum. Loksins er ég farin að sjá árangur erfiðisins. Ekki misskilja mig samt - ég er ekki búin að læra að syngja! Ég held að maður læri það nú reyndar aldrei... Ég er samt t.d. farin að heyra og finna þegar ég er að gera vitlaust, heyra þegar aðrir gera eitthvað ekki alveg eins og á að gera það og ég held að röddin í mér hafi stækkað um 4 númer á einu ári! Ef ég verð áfram svona dugleg tek ég vonandi grunnprófið í vor.

Barnabækur er það sem vermir náttborðið þessa dagana og ekki í fyrsta skiptið. Það er svo gott að lesa barna- og unglingabækur, þær eru ekki með einhverjum óþarfa flækingi og slaufum. Í 96% tilvika enda þær líka vel og hvern langar nú eiginlega að lesa skáldsögu sem endar illa...? Er að klára Sitji Guðs Englar, Saman Í Hring er næst. Svo las ég um daginn Peð á plánetunni jörð. Hún er um alvöru fólk með alvöru vandamál og hún endar vel. Já og svo les ég helst ekki barnabækur sem ég hef ekki lesið áður. En ég les samt aldrei fyrsta kaflann aftur. Hef til dæmis örugglega lesið Sitji guðs englar, saman í hring og sænginni yfir minni 10 sinnum og Peð á plánetunni jörð álíka oft.

Fór í sögupróf í dag og ég væri að ljúga ef ég segði að mér hefði gengið vel...

Dýrmætur farmur

2005-11-01T14:46:00.000Z

Alltaf sama vesenið á mér. Það er löng helgi um næstu helgi og í staðinn fyrir að drífa mig strax suður eins og góðri stúlku sæmir, ætla ég heim á fimmtudaginn og sjá Hrólf brillera í Blessuðu barnaláni. Ætla reyndar að taka hann upp svo mamma geti líka séð hann. Svo þarf pabbi greyið að aka heimasætunni til Akureyrar þaðan sem hún flýgur til Reykjavíkur á dýrasta miðaverði.

Helgin var afar róleg. Gerði mest lítið. Fór samt með Ella í hestaflutninga og undirbjó komu Þjóðverjana. Lærði sem sagt ekki neitt. Ekki fyrir sögupróf, ekki neitt í stærðfræði. Ég er farin að vera svona hæfilega kærulaus í náminu. Ég er ekki að segja að ég sé ekki að læra - ég læt námið bara ekki stjórna mér. Ég kýs reyndar að kalla þetta ekki kæruleysi heldur forgangsröðun nútíma konu á framabraut...

Það eru tónleikar eftir viku og ég er að fara að syngja tvö lög í samsöng á eftir. Það er gaman að segja frá því að ég kann hvorugan textan!

Snjókorn falla

2005-10-28T14:18:00.000Z

Ég sé fram á það að verða strandaglópur á Akureyri í dag. Ég verð að syngja á tónleikum milli 5 og 6 og allir sem ég veit um eru að fara fyrir þann tíma. Veðrið er vont þannig að líkurnar á að finna far eftir klukkan 6 fara minnkandi...

Ég keypti mér úlpu í gær og er mjög ánægð með hana. Þetta var samt merkileg búðarferð að því leyti að ég var ein og var í mesta lagi 10 mín inni í búðinni. Undir venjulegum kringumstæðum hefði ég verið ótrúlega lengi að hugsa mig um, ákveðið síðan bara að koma daginn eftir og ekki farið fyrr en eftir viku. Þá hefði flíkin ekki verið til í minni stærð og mínum lit.

Bendi öllum áhugasömum að lesa ferðasögu Kára frænda sem er að interrailast í A-Evrópu.

Arna bassi

Sjálfsblekking?

2005-10-26T10:22:00.000Z

"Já og einu sinni enn með ykkur, bassar"

Já þarna var verið að tala við mig... Ég er bassi. Það er þemavika í tónlistarskólanum og grunnstigið syngur negrasálma þríraddað. Eins og ég sagði erum við þrískipt og sætaskipan réði því að ég lenti í neðstu rödd. Ég hélt í tvo sólarhringa að þessi rödd héti annar allt. Ég lifði í sjálfsblekkingu - hún heitir bassi. Fékk áfall þegar Sigga söng sagði þetta í fyrsta skipti, nett sjokk þegar hún sagði þetta í annað skipti en í þriðja skiptið áttaði ég mig: Er þetta ekki draumur minn, um þáttöku í karlakór, að rætast?

Við erum kraftakerlingar ligga ligga lá

2005-10-24T18:19:00.000Z

Funduði þetta stelpur...?

Já ég þori, get og vil!

2005-10-24T12:58:00.000Z

Í dag vildi ég óska þess að ég ynni einhver staðar, bara svo ég gæti gengið út kl 14:08. Mér finnst allt svona byltingakennt og öfgakennt skemmtilegt! Sérstaklega ef það snýst um réttindi einhverra minnihlutahópa. Í dag er þessi minnihlutahópur konur. Mikið vona ég að það taki margir þátt í þessu svo þetta verði ekki slappt. Þetta er allt of gott málefni til þess að leyfa þessu að verða slappt!

Ég held ég hafi ekki borðað neitt, sem amma myndi kalla mat, um helgina. Fæða mín samanstóð af óbökuðum marens, grillaðri brauðsneið, hamborgara, kókopuffsi, grillaðri brauðsneið, rjómapönnuköku og grillaðri brauðsneið.

Húsmóðurveiran er búin að taka sér bólfestu í mér. Dæmi: ég borða alltaf standandi við vaskinn - ef ég er ein heima þ.e.a.s.

Stórskemmtilegt slægjuball um helgina. Carmen-rúllurnar alveg að gera sig. Þarf að prófa gufurúllurnar hennar Siggu næst.

Sjáumst í Sjallanum kl 15:00!

Rjómi?

2005-10-21T20:31:00.000Z

Ég sveik Óla (Volvo-inn) og kom ekki á honum heim. Hann getur eiginlega sjálfum sér um kennt því hann er bara með eitt nagladekk. Er bara ánægð eftir að ég sá að ég hefði nú líklega bara runnið stjórnlaust niður víkurskarðið hefði ég farið á honum.

Dreif mig í búðina þegar ég kom heim og ætlaði bara að kaupa aðeins í tvær kökur en ég er ekki frá því nema það hafi heltekið mig einhver húsmóðurveira í búðinni því í staðinn fyrir að kaupa bara það sem ég ætlaði, rötuðu ótrúlegustu hlutir, sem ég ætlaði ekkert að kaupa, ofan í körfunni. Ég meina, afhverju keypti ég lítið smjörstykki og hveiti þó ég þyrfti það ekkert og það væri sjálfsagt til heima. Er að baka fyrir Hrólf, það er kökubasar á morgun og Arna er í tilraunastarfsemi með marengsbotna, rjóma og alls konar súkkulaði (aðallega rommkúlur og rommí). Ég náði líka að gera eitt sem hefur aldrei gerst í sambandi mínu við marens; mér tókst að gera fyrri plötuna að einhvrjum klessum , en seinna platan er að gera mig stolta í ofninum.

Hver leyfði að gömlu, ósamstæðu, ónýtu póstkassarnir væru teknir og í staðinn kæmu einhverjir samstæðir, fallegir og ólekir? Átti ekkert að spyrja mann álits?

Er ekki frá því nema ég hafi kannski bara náð stærðfræðiprófinu. Kannski Níels fari að vita hvað maður heitir ef maður stendur sig í þessum prófi, eða allavega vita í hvaða bekk maður er!

Skálaferð og slægjufundur

2005-10-21T11:26:00.000Z

Kom úr skálaferð í gær. Hún var voðalega fín og róleg - margir sem kviðu fyrir stærðfræðiprófinu, sem við erum að fara í á eftir, og lærðu.

Lýsandi dæmi fyrir það hvað ég er heppin: Ég var fengin til að keyra bíl heim í dag sem er bara frábært. Þ.e. að geta verið á sinni eigin dagskrá. En nei - þá er bara orðið kalt og vegagerðarvefurinn segir að það sé hált alla leiðina heim. Volvo kallinn er ekki á neinum súper dekkjum þannig að mér sýnist að ég verði bara að koma mér einhvern veginn öðruvísi.

Leitin að þarfanautinu er án efa það sem stendur upp úr sjónvarpsdagskrá vikunnar! Hló mig máttlausa.

Er farin að líta á stærðfræðina áður en ég legg svo í prófið ógurlega. Trúi ekki öðru en ég nái!

Sögulegur sögutími

2005-10-18T14:22:00.000Z

Í dag verð ég mönnum sinnandi í fyrsta skipti í langan tíma. Ekki einu sinni tónlistarskóli! Þessar síðustu vikur hafa verið erfiðar og magasárs/taugaáfalls valdandi. Í gær var ég t.d. frá 16til 20:40 að gera sögufyrirlestur. Sá fyrirlestur var einmitt fluttur í dag og féll í skugga sama viðfangsefnis og mikillar umræðu um fyrirlesturinn á undan.

Eina verkefnið sem skyggir á hamingju mína er stærðfræðiprófið á föstudaginn! Eftir það er ég að hugsa um að gera mér glaðan dag.

Slægjuball á Laugardaginn.

Sunnudagsmorgun

2005-10-16T14:52:00.000Z

Ég er ekki frá því nema að dagar magasárs og taugaáfalls séu úr sögunni þar sem ég búin að skila heimadæmunum, þýskuverkefninu lokið, íslenskuritgerðina vantar bara eina setningu og ég er að vinna í söguverkefninu. Þetta ástand varir örugglega ekki lengur en fram á miðvikudag þar sem það er stærðfræðipróf og fimmtudag.

Ég verð aftur mönnum sinnandi á þriðjudaginn til miðvikudags.

Stóri bróðir?

2005-10-10T19:58:00.000Z

Ef ég hefði kveikt á sjóvarpinu mínu svona u.þ.b. klukkan 19:20 hefði ég orðið undrandi en mjög glöð. Ég hefði nefnilega haldið að það væri einhver ný sjónvarpstöð komin í loftið og ég væri með frítt áhorf. En nei, svoleiðis var það nú ekki. Atburðarrásin var svona:

Páll Magnússon las fréttirnar. Ekki í fyrsta skipti en það voru örugglega einhverjir sem ekki höfðu heyrt hann lesa fyrr.
Fyrsta fréttin í íþróttafréttum var um skylmingar.
Það eru komin ný veðurkort í veðurfréttirnar. Þór greyið átti í mestu erfiðleikum með tæknina.
Það er byrjað að senda út nýjan dægurmálaþátt að fréttum loknum.

Má skipta um allt í einu? Ruglast ekki stór hópur eldra fólks í ríminu?

Skólayfirvöld hafa komist að því að lögheimili mitt er í Suðurbyggð 4. Ég var svo sem ekkert að leyna því fyrir þeim en ég var ekkert að segja þeim það heldur. Ég sá þetta þegar ég gáði á INNU áðan. Veit ekki afhverju mér er svona barnslega mikilvægt að fólk viti að ég er úr Mývatnssveit en ekki Akureyri. T.d. sagði ég í handbók skólans að lögheimilið mitt væri á Grænavatni en aðsetur í Suðurbyggð. Það gerði ég daginn áður en lögheimilisskiptin gengu formlega í gegn, þannig að ég var í rauninni að segja satt.

Ekki laust við að ég sé með kjánahroll við að hlusta á umræðurnar í nýja Kastljósinu...

Landsbyggðarfordómar...?

2005-10-08T13:59:00.000Z

Í dag, laugardaginn 8.október, er kosið um sameiningu sveitarfélaga í Þingeyjarsýslu. Sjaldan eða aldrei hefur mig langað jafnheitt að vera orðin 18. Ég held að það hljóti að vera góð tilfinning að setja stóran og klunnlegan kross við "NEI". (Ég þyrfti reyndar að eiga lögheimili í Skútustaðahreppi til að mega kjósa, en það er annað mál.) Ég er alls ekki að segja að ég sé á móti Norður-Þingeyingum, þar sem að ég þekki nú einn alveg aldeilis ágætan. Ég er hins vegar að reyna að finna hvað Mývatnssveit og t.d. Raufarhöfn eiga sameiginlegt. Það er ekki nóg með að atvinnuvegirnir séu mjög ólíkir, heldur er þetta nánast á sitt hvorum endanum á landinu!
Í dag er ég pólitísk og set ég traust mitt á Mývetninga með kosningarétt.

Læri og tilheyrandi í kvöldmatinn.

Heimskur hlær að sjálfs sín fyndni.

2005-10-04T23:00:00.000Z

Ég hló eins og hálfviti þegar ég var að horfa á veðurfréttirnar áðan. Ekki það að veðrið hafi verið svona skemmtilegt (við eigum ennþá von á snjó), heldur sagði veðurfræðingurinn svo skemmtilega frá. Frásögn hans hljómaði einhvernveginn svona:

"Lægðin hefur sagt skilið við landið og er nú austan við það en hún skildi eftir afkvæmi ofan við Borgarfjörð. Litla lægðin á eftir..."

Mér fannst mjög fyndið að heyra virðulega veðurfræðinginn tala um "litlu lægðina" hvað eftir annað. Þetta var svona eins og barnasagan um litlu lægðina sem týndi mömmu sinni austan við land. Það þarf svo lítið til að skemmta mér...

Hildur frænka er örugglega komin á "most wanted" lista lögreglunnar í Prag eftir atburði dagsins. Hún reyndi s.s. að skipta fölsuðum 100$ seðli í banka og var tekin inn í bakherbergi. Þar var henni tilkynnt að seðillinn væri falsaður og það yrði að kalla á lögregluna. Hún lét nú ekki segja sér það heldur neitaði fyrst að seðillinn væri falsaður. Þegar hún sá loksins að hann var aðeins öðruvísi á litinn heldur en aðrir seðlar, sagði hún manninum að hún ætlaði sko ekki að leyfa þeim að taka hann, heldur ætlaði hún sjálf með hann í bankann þar sem hún fékk hann hjá frænku sinni áður en hún lagði af stað. Ekki veit ég hvað hún hefur sagt við manninn en hún er enn með seðilinn. Það skal tekið fram, svo það fari ekki milli mála, að Hildur hafði ekki hugmynd um að seðillinn væri falsaður þegar hún reyndi að skipta honum!

Óvænti söngtíminn í dag var einmitt það sem ég þarfnaðist.

2005-09-30T19:26:00.000Z

Haloscan commenting and trackback have been added to this blog.

Leyniorðaflækja

2005-09-30T18:27:00.000Z

Í dag fór ég, eins og stundum áður, að hugsa um hvað ég þyrfti eiginlega að geyma mörg aðgangs- og lykilorð í hausnum á mér. Stundum verð ég svo rugluð að það hálfa væri mikið meira en nóg. Ég er með lykilorð að:

Símanum mínum.
Tölvunni minni.
Heimabankanum og svo annað sem leyninúmer inni í heimabankanum.
MA- póstinum og tölvukerfinu.
Hotmailinu (msn-inu).
Debetkortinu mínu.
Kreditkortinu mínu.
Innunni
Spjallinu á muninn.is
Blogginu.

Auk þess eru alltaf einhver tímabundin lykilorð sem maður þarf að muna eins og t.d: ökukennsluvefur, angel-verkefnavefur framhaldskólanna, nemanetið o.s.frv. Ég hef stundum reynt að nota sömu lykilorðin sums staðar en kröfurnar sem settar eru til lykilorða eru afar misjafnar. Þetta gerir það að verkum að stundum prófa ég þrisvar að komast inn á eitthvað áður en ég man rétta lykilorðið. Ég á ekkert í yfirstíganlegum vandræðum með þetta núna en guð hjálpi mér þegar ég er orðin gömul og kölkuð. Þá á ég aldrei eftir að geta:

Séð um fjármál mín sjálf, því ég kemst hvorki í heimabankann eða hraðbankann og man ekki símanúmerið í sparisjóðnum
Kveikt á tölvunni eða símanum. En það er allt í lagi því að þá er komin afsökun fyrir að komast ekki í heimabankann eða geta ekki hringt í sparisjóðinn
Haft nein rafræn samskipti því að ég man ekki lykilorðið á tölvupóstinum og msn-inu og hvað þá að ég muni lykilorðið að blogginu.

Þegar ég verð stór ætla ég að vera búin að samræma lykilorðin mín svo ég tapi ekki glórunni í ellinni.

Endalaust veður

2005-09-28T10:18:00.000Z

Þegar ég kom í skólann í morgun var svona sambland af snjókomu og rigningu. Þegar ég leit út um gluggann í löngu var bar snjór. Núna sit ég inni á bókasafni og sé ekki á skjáinn fyrir sól, en samt er snjókoma líka. Þetta er næstum því eins og í 66° norður auglýsingu.

Í dag er ég með háleit markmið. Ég ætla mér að:

Vera í skólanum til hálf fjögur.
Fara í söngtíma kl hálf 5, þó að mér sé illt í munninum.
Nota klukkutíma gatið, sem myndast í tónó, til að gera heimadæmin mín. En ég enda örugglega á Glerártorgi að skoða úlpur og fá mér kakó.
Vera á kóræfingu frá 6-8.
Ganga heim.
Horfa á ER og ANTM sem byrja kl 8. 8 er einmitt tíminn sem ég ætla líka að vera að labba heim af kóræfingu.
Gera afganginn af heimavinnunni minni.

Eftir að vera búin að skoða málið sýnist mér að það mikilvægasta á listanum sé að ná ER og ANTM. Það hefst aðeins með því að:

Sníkja far heim af kóræfingu.
Treysta Hrólfi til að taka upp ER og horfa á hana um helgina.
Missa af byrjuninni af ANTM.

Það er svo erfitt að vera ég...

Tanntaka á gamalsaldri.

2005-09-26T19:19:00.000Z

Í dag á ég við vandamál að stríða sem ég hef ekki átt við að stríða í u.þ.b. 17 ár. Ég er að taka jaxl og það er vont! Ég ótrúlega sár aftast í munninum og get náttúrulega ekki látið það vera. Ég er aum utan á hálsinum og í kjálkanum og ég get ekki hætt að tala um þetta. Nú skil ég alveg krakkana sem eru að taka tennur og þegja ekki - þau bara geta ekki hætt að tala um þetta!

Bónus-phobia

2005-09-24T20:50:00.000Z

Ég er haldin fóbíu sem ég skammast mín ekkert fyrir að viðurkenna. Ég er haldin svokallaðri "bónus-fóbíu". Hún lýsir sér þannig að ég forðast eins og heitan eldinn að versla í bónus nema á rólegum virkum morgnum þegar enginn annar er í búðinni og mig bráðvantar eitthvað sem ég fæ ekki annars staðar. Ég get ekki hugsað mér að fara þar inn seinni partinn þegar fólk er að koma úr vinnu og ég tala nú ekki seinni partinn á föstudögum. Til dæmis í gær ætlaði ég að fara með Magneu í bónus en við hættum snarlega við þegar röðin náði næstum út í hinn endann á búðinni. Þegar svona margir eru í búðinni myndast svona "survival of the fittest" stemmning. Oft hef ég óttast að vera troðin undir innkaupakörfum (sem b.t.w. eru fáránlega stórar!) húsmæðra sem hlaupa eftir síðasta kjötfarspakkanum á tilboði. Ég er alveg tilbúin að eyða 2-3 kr aukalega fyrir öruggt umhverfi.
Ég versla frekar í nettó - geðheilsunnar vegna.

Allt er í heiminum hverfult...

2005-09-23T07:05:00.000Z

Það er víst ekki lengur hægt að berjast á móti straumnum og koma skoðunum sínum á framfæri öðruvísi en á bloggi. En þetta verður ekki hið hefðbunda: "...svo fór ég þangað og hitti þennan og það var ógsla gaman." Þetta verður meira svona það sem ég er að hugsa en er aldrei tilefni til að segja.
Arna kveður í fyrsta - en ekki seinasta skipti!